Vawiin chawhnu dar 1 khan Special Blind School (SBS), Durtlang chuan an School atanga HSLC leh HSSLC pass tharte lawmpuina hun an hmang a. Khuallian, School Education Minister Pu H. Rohluna leh Khualzahawm, Mizoram Women Commission Chairman Pi Vanlalawmpuii, MLA bakah AMC Ward No. I Councilor Pi R. Zomuanpuii, RMSA Dy Project Director leh zirlai nu leh pa thahnem takin he hun hi an hmanpui a ni.

Khuallian School Education Minister Pu H. Rohluna chuan SBS-in HSLC leh HSSLC exam-a hlawhtlinna ropui tak a nei chu a lawmpui thu sawiin, “Pianphunga rualban zawk, zirna hun tha leh zirna school tha taka nu leh pa leh zirtirtuten thahnem ngai taka an zirtir pawh a pass zo lo tam tak an awm lai a khawhmuh lama harsatna nei chunga SBS naupangten hlawhtlinna ropui tak an chang chu mi tam tak tlukloh a ni,” a ti a. Khuallian chuan, “SBS hlawhtlinna hian Mizo thalaite hnenah thuchah ropui tak a sawi a ni,” a ti bawk. Samaritans’ Association for the Blind (SAB) in mitdelte tana a hmalakna chu fakin Minister chuan, “Beidawnna in a bawh khah mai turte beiseina petu in ni,” a ti a. SAB enkawl SBS-a thawk zirtirtute inpekna pawh fakin, zirnain pangngaia thawktute aia inpekna thuk zawk nen thawh tul a nih avangin in hnathawh hi a chhuanawm takzet a ni, a ti bawk. SBS zirlaite chu mahni inrin tawkna nei tura chahin Pu H. Rohluna chuan “Mi tih ang in ti thei tih in rual u ten an lan tir tawh chu infuih nan hmangin, tumruhna leh thawhrimna nen, kut ke kim, mi pangngai zawkte tlukloh ni thei turin tan la tur zel ang che u.” tin a sawm bawk. School Education Minister chuan Mizoram sawrkarin zirna tihhmasawn a tum dan leh hmalakdan sawi langin, “Khawvel thiamna leh hmasawnna ban phak tura thalaite buatsaiha hi tuna kan ram dinhmun aia thazawka ram hruai thei tura thalaite buatsaih hi kan tum ber a ni,” a ti a. Rualbanlote hamthatna pawh a dawngtu tur dik takten an chanvo dik tak an chan theih nan sawrkarin hma a la zel dawn a ni, a ti bawk.

Khualzahawm, Mizoram Women Commission Chairman Pi Vanlalawmpuii pawhin SBS naupang, harsatna hrang hrang kara theihtawp chhuaha lehkha zirte hlawhtlin chu ropui a tih thu a sawiin, SBS naupangte hlawhtlinna chu zirlai dangte hlawhtlinna nen tehkhin rualloh a hlu leh ropui a ni, a ti a. Zirtirtute leh thawktute inpekna chu chhuanawm a tih thu a sawi bawk.

Special Invitee, AMC Ward No. I Councilor Pi R. Zomuanpuii pawhin pass tharte lawmpuina thu leh fuihna thu a sawi a. Kalkhawmte atangin fuihna thu tha tak tak ngaihthlak a ni bawk.

SBS pass lawmna inkhawm hi SAB Senior Adviser Dr. C. Biakmawia’n a kaihruai a. SAB President Pu R. Thanga chuan SBS din dan leh an hmasawn dan chipchiar takin report a pe a. SBS enkawl kawnga SAB harsatnate School Education Minister hnenah a thlen bawk. Pass lawmna inkhawm hi Pu C. Lalhlira’n lawmthu sawiin a khar a ni.

Residential Special Blind School hi kum 2001 khan Samaritans’ Association for the Blind in a din a ni a. Kuminah hian SBS atangin mi pahnihin HSLC an pass a. SBS Boarding atangin zirlai pahnihin HSSLC tha takin an pass bawk. SBS-ah hian class 1 atanga class X thleng awmin tunah hian zirlai 26 leh zirtirtu 10 an awm mek a. An zirlaite zingah HSLC pass 16, HSSLC pass 6 leh BA pass 1 an lo awm tawh a ni.