Vawiin khan Rural Development Minister Pu R. Lalzirliana kaihhruaiin Aijal Club Conference Hall-ah RD Department hnuaia sorkar laipui bultum hmasawnna scheme hrang hrang kalpui dan thlirhona neih a ni a. He hunah hian Directorate-a officer-te leh RD Block hrang hrang BDO-te an tel a ni.
Review Meeting Chairman, Minister Pu R. Lalzirliana chuan RD Department hnuaia hmalakna hrang hrangte chu thingtlang a cheng ten an mamawh hamthatna an hmuh ve theih tur an chan ngei a, hma an lo sawn zel theihna atan duan a nih hlawm avangin officer-te chu theihtawp chhuah zel turin a chah a. Tun hnaiah BDO-te lakah hnathawh thatlohna emaw pamhamna kaihhnawiha inpuhna hriat tur a awm ta ngailo chu lawmawm a tih thu sawiin, thawktuten mipui rawngbawltu an nihna ah an chian zia leh an thanemngaihna a tilang hle a ni, a ti. RD Minister chuan RD Department hnuaia officer-te chu hnathawhna mai bakah an awmna khawi hmunah pawh nun fimkhur tak chungin rinawmna vawng zel turin a chah bawk.
Pi. K. Lalrinzuali, Addl. Secretary, RD Department chuan thu a sawi bawkin, Mizoramin IAY (tuna PMAY ni ta) leh Shyama Prasad Mukherji Rurban Mission (SPMRM) a hnathawh that vangin lawmman a dawng chu thawktute thahnemngaihna vang a ni tiin lawmawm a tih thu a sawi a; chutihrual chuan lawmmawn dawn chu department thil tum ber a nih loh thu leh, mipui rawngbawltu an nih angin tan ngaihna laiah te tang taka thawh zel a tul thu a sawi a ni.
Vawiin review meeting-ah hian scheme hrang hranga hnathawh thlirletna leh hmalak zel dan turte sawihona neih a ni a. eFMS universalization, Demand & Timely payment of wages, Geo MgNREGA, Labour Budget, Commitment of Works, Master Circular chungchangte sawiho niin, BADP leh PMSKY hlawhtlinna te, Block hrang hranga kalphung tha leh hlawk zawk chin thar te, Job card verification, Seven Registers maintenance, Work Plan & Completion of works (2017-18) chungchangte, MzSRLM hnuaia hnathawh tawh chungchangte leh Social Audit report te ngaihthlak a sawihona te neih a ni. Hun hi Pu R. Lalthazuala, Deputy Secretary, RD Department chuan lawmthu sawiin a khar a ni.
