Vawiin khan Finance Minister Pu Lalsawta chuan Volunteers for Community Mental Health (VOLCOMH) office-ah VOLCOMH hmalakna thar Mental Health Day Care (Teen Mental Health Initiative) a hawng.
Pu Lalsawta chuan khawvelin hma a sawn chak ang bawkin sualna pawh a pung ve zel a, Aizawl khawpuiah pawh khawpui dangte ang bawkin khawtlang leh chhungkaw nun tibuaitu sualna a lut ve zel, a ti a. Khawpui nunah chuan veng khata chengho te leh thenawm khawveng te takngial pawh intlawhpawha, inhriat vek sen a ni lo a, chhungte tan pawha hriatthiampui harsa mental health natna veitute tanpui tura pawl din VOLCOMH hmalakna chu a fakawm hle a ni, tiin an hnathawh chu Pathian rawngbawlna tangkai tak nia a hriat thu a sawi.
Finance Minister-in a hawn tak Mental Health Day Care hi tleirawl, a bik takin pawl 11 leh 12 zirlai, rilru lama harsatna neite tanpuina tura duan a ni a. Hmalakna hmasa atan School pali - JL Hr.Sec.School, Synod Hr.Sec.School, Oikos Hr.Sec School leh Mamawii Hr.Sec.School te thlan chhuah niin heng school paliah hian pilot project anga kalpui tum a ni a. July thla chhung hian school palia zirlaite dinhmun zirchianna turin zawhna leh chhanna (questionaire) an semchhuak ang a. Zirtirtute tan mental health chungchang intuaihriamna hun an hmanpui ang a. Chumi hnuah a tul a nih chuan naupang chhungte kawm an ni leh ang. Zirlaite dinhmun an zirchian atanga an thil hmuhchhuah a zirin Mental Health Day Care hmalak zel dan tur chipchiar zawkin an duang dawn a ni.
VOLCOMH hi kum 1992 a mi thahnemngaite din niin rilru lama harsatna neite tan counseling te buatsaihin training, seminar, workshop leh awareness vawi tam tak an lo kalpui tawh a. Mizoram State AIDS Control Society te nena thawk hovin female sex workers te leh drugs addict ten AIDS an vei lohna tur leh a vei tawh ten midang an kai darh lohna tur te, anmahni hriselna enkawl chungchangah leh ngawl an veina laka chhanchhuah an nih theih nan hna an thawk a. UNODC CHARCA leh Social Welfare Department nen thawkhovin nunphung pangngaia khawsa theilote tanpui hna an thawk thin a ni.
Mental Health Day Care hawnna inkhawm hi an President Dr. Zoengpari’n a kaihruai a. Secretary Pu H.Ngurthansanga leh Counsellor Pi Zomuanpuii te’n an project kalpui dan tur tlangpui an tarlang a. Zawhna leh chhanna hun hman zui a ni.
