Vawiin chawhma khan Agriculture Conference Hall-ah  All Mizoram DRDA Employees Association (AMDEA) chuan 3rd General Body Meeting an nei a, Rural Development Minister Pu Lalruatkima chu Khuallian a ni.

Minister Pu Lalruatkima chuan sawrkar hnathawkte inelna tur chu tunge hnathawk tha ber? tihah a ni a, a hming mai maia thawk tur kan ni lo a ni tiin kan hnathawh reng reng felfai takin kan hlenchhuak thin tur a ni, a ti a. Rural Development (RD) department hna kalphung pawh chak zawk leh hlawk zawka hnathawh theihna a nih dawn chuan her danglam theih a ni, a ti a. Hlawh hmu tlakin hna kan thawk tur a ni tiin sawrkar laipui atanga sum lo lut hi tangkai thei ang bera hman kan inzirtir a ngai a ni, a ti a. DRDA hnathawkte chu thingtlanga mi harsa zawkte enkawltu in ni tiin mipui tana thawk kan ni tih kan hriatreng a pawimawh a, mipui min dawrtute tan pawh biaknuam tak kan ni tur a ni, a ti a. Sawrkar thar flagship programme SEDP ah pawh kan ramin ei leh bar kawnga hma a sawn theih nan hmalak a ni dawn a, hetah pawh hian sawrkar kut leh keah kan tang leh anga, theihtawp kan chhuah a ngai a ni, a ti a. An kal zelna turah duhsakna a hlan a ni. 

All Mizoram DRDA Employees Association (AMDEA) hi August 2016 khan din niin February Ni 16, 2017 khan General Body Meeting vawikhatna, Synod Conference Centre-ah an lo nei tawh a. AMDEA-ah hian member 117 vel an awm mek a ni.

Programme hi AMDEA Vice President Pu David Zodingliana chuan a kaihruai a. DRDA Aizawl APO (WD) Pi R. Laltanpuii atangin secretary report ngaihthlak niin DRDA, Aizawl AE Pu H. Saizama atangin financial report ngaihthlak a ni a. AMDEA President Pu PC Lallawmkima chuan thusawina hun a nei a. AMDEA Asst. Secy Pi Evelyn Lalhmangaihi chuan lawmthu sawina in hun a khar a. Chawhnu lamah AMDEA Office Bearers inthlanna neih a ni ang. AMDEA member 60 chuang an kalkhawm a ni.