Vawiin khan Mizoram Governor Pu Kummanam Rajashekharan chuan Dr.C.Lalzirliana chu State Information Commissioner thar atan a lalut. Raj Bhawan Durbar Hall-a inkhawm tawite Mizoram Chief Secretary Pu Lalnunmawia Chuaungo kaihhruaiah Mizoram Governor chuan Dr.C.Lalzirliana chu chhechham tirin State Information Commissioner thar atan a lalut a ni.

Dr.C.Lalzirliana hi Pu L.N.Tluanga (L) leh Pi Zaithanchhungi (L) te fa niin 11th December, 1961 khan a piang a, tunah hian a nupui leh fa 2 nen Luangmual, Aizawl-ah an cheng mek a ni. Dr.C.Lalzirliana hi India ramchhung hmun hrang hrangah school leh college a kal bakah rampawn USA-ah te pawh zirna sang zawk umin engemaw chen a khawsa tawh bawk a ni. Amah hi zirna lamah M.B.A., M.Com. leh Ph.D. a ni a; Pachhunga University College, Hrangbana College leh Aizawl College-ah te Commerce subject-ah Lecturer hna engemaw chen a thawh hnuin Mizoram sorkar-ah Development Officer, KVI-ah kum 1987 khan lutin, ni 25.10.2011 atanga 20.9.2016 chhung khan Director, Trade & Commerce hna a chelh a ni.