Vawiin khan Dawrpui Multipurpose Hall, Aizawl-ah Mission Foundation Movement (MSM) bultumin thingtlang thalai harsa zawk leh chanhaite thiam thil zirtira eizawnna kawng kawhhmuhna programme Deen Dayal Upadhaya Grameen Kaushalya Yojana (DDU-GKY) zirzo thalai 87 te chawimawina hun buatsaih a ni a. Rural Development Department Minister Pu Lalruatkima chuan khuallin niin hun a hmanpui.

He hunah hian khuallian Pu Lalruatkima chuan DDU-GKY course zirzo thalaite fuihin an hna theuh hlut thiam tu ni a, mite awh tlaka an hna ah tui tak a thawk turin a chah a. DDU-GKY chu Rural Development Department in Mizoram State Rural Livelihood Mission (MzSRLM) kaltlang a thingtlang thalaite thiamna bik neih tir a eizawnna tur kawng buatsaih sak tura hma an lakna a ni tih sawiin PIA Mission Foundation Movement te thahnemngaihna avanga a hlawhtlinna rah seng tur a awm tan mek chu lawmawm a tih thu a sawi. Sawrkar Laipui a Ministry of Rural Development ruahmanna ang a he programme hi kalpui a nih thu sawiin skill development training buaipuitu department dangte nen an inanlohna chu an hnuaia zirlaite eizawnna tur leh an thawhna tur thlengin ngaihtuahsak an nih hnun ah an hmasawn dan t evil rengin an enkawl zui zel a ni a ti.

Minister chuan sawrkarin thala thiamna nei, eizawnna kawnga bul tan ngaihna hre silo te tanpui hi a ngaihpawimawh ber pakhat a ni a, thalaite tana khawvel thar siam hi SEDP tum bulpui ber pakhat a ni a ti a, hemi atan hian SEDP hnuaiah Human resource Development Board pawh a din hial a ni a ti. Zirlai trainuing chhuakte chu MFM kaltlanga sawrkarin an thiamna leh theihna a haichhuahsak chu chhawr tangkai ngei tura fuihin, Mizote hi kan pi leh pute atangain kutdawh hnam kan ni ngai lova, hnam rinawm leh midangte tanpuia a pechhuaktu zawk kan ni thin tih hre reng tura zirlaite chahin an kalna apiangah nunpui chhunzawm zel turin a chah a ni.

DDU-GKY hi Ministry of Rural Development hnuaia Skill development programme niin, Mizoramah chuan MzSRLM in a enkawl a, State Project Approval Committe in Mizoram tana PIA a thlan an nih angin Mission Foundation Movement hi kum thum chhung atan target 400 pek an ni a, anni hian

Healthcare sector thlangin GDA (General Duty Assistant) course an kalpui a. He scheme hian thalai mipa leh hmeichhia, thigbtlang mi, eizawnna mumal neilo ten dinchhuahpui tlak thiamna bik an neih ve theihna turin training kalpui a ni a, placement pawh 70% tal nei ngei ngei tura beisei an ni.

Berawtlang, Zemabawk ah zirna in neiin batch hmasa ber atan Mizoram chhung district hrang hrang atangin BDO te kaihhruaina hnuaiah zirlai 96 lak an ni a, an zinga 86 in tha takin an zirchhuak a ni. Zirlaite hi sawrkar laipui duhdan angin darkar 596 chhung zirtirna pek an ni a, health sector related subject bakah IT leh soft skills te pawh zirtir tel an ni a. Zirlai an zawh hma in Campus Placement Interview neihpui an ni a, organization hrang hrang ten an zirna hmunah kalin online interview leh personal interview an neihpui a, tunah hian hnathawh tur (placement) hmu fel tawh zirlai 31 an awm a, an zinga 4 hian foreign placement an hmu a, India ramchhung hmun hrang hranga placement hmu 14 leh Mizoram chhunga placement hmu 13 an awm a ni. Anni bakah hian hna hmuhsak tawh leh hna zawm lehnghal mai tur mi 10 chuang zet an awm mek bawk.

Mission Foundation Movement hi kum 2004 a din tan niin, thalai ten eizawnna tlak thiamna chi hrang hrang an theih nan leh mi rinawm, chhawrtlak ni tura a chher tura din niin Skill Development Programme chi hrang hrang bakah, Nursing School, Laithangpuii College pf Pharmacy bakah Rural Livelihood Programme leh Rural Health Project te an kalpui mek a ni.