Vawiin khan Tripura Transit Camp 6-a Mizoram mi leh sa Reang (Bru) awmte laklet hna thla thar October Ni 3 atanga thawh tan tura inbuatsaihna hrang hrang thlirin District Level Core Committee On Reang (Bru) Repatriation, Mamit District chu an Chairman Dr Lalrozama, District Bawrhsap  hovin DC Conference Hall-ah thutkhawm ni a. Mizoram Home Department aiawhin David H. Lalthangliana, Deputy Secretary, chuan a telpui bawk.

Meeting kaihruaitu Dr Lalrozama chuan kan hma lawka Mizoram mi leh sa Transit Camp a awm mekte laklet hna thawhna turah Sawrkar Department hrang hrangte'n kan mawhphurhna theuhte tha taka hlen tura an  inbuatsaihna-ah lawmawm a tih thusawiin laklet hna hlawhtling taka kalpui a nih theihnan Kohhran, Tlawmngai Pawl hrang hrangte thawhpuiah a sawm a ni.

Laklet hna thawh tur hi ruahman lawk dan chuan October Ni 3, 2019 atang hian Tripura Bru camp 6 zinga Mizoram hnaih ber Kaskau Camp atangin thawh tum a ni a. A tahtawlin Camp parukte hi tih chhoh zel a ni ang. 9th Batch Repatriation-ah hian Mamit District mi leh sa chhungkaw 3368-te chu Identification hnuhnung bera Mizorama hruaikir tura ruahman an ni a, heng chhungkuate hian Mizoram-a rawn luh an duh thu an sawi mai bakah Mizoram khua leh tui dik tak an ni tih finfiah (Identification neih fel) tawh an ni. Laklette hi Mamit District chhunga khaw hrang hrang 39-ah awm tura ruahman an ni a.  Tunhmaa an lo awm tawhna khua bakah vote an neihna constituency chhungah te dah tura ruahman an ni bawk.

Vawiin Meeting-ah hian Reang ( Bru) te Mizoram an rawn leta an awmna tur atana tul hrang hrang Kawngpui, Kawlphetha, Tui, Transportation bakah Hriselna dinhmun chungchanga inbuatsaihna te thlirho niin laklet hna thawhna tura venhimna kalpui dan tura ruahmanna SP Mamit hnen atang ngaihthlak a ni a.  Buhfai mamawh anih dan DCSO, Mamit atanga ngaihthlak niin, Lirthei mamawh dan leh ruahmannate DTO Mamit atang te'n ngaihthlak a ni bawk. Heng bakah hian Staging Area atana ruahman, Zamuang, Kawrtethawveng leh Mamit (4th IR Bn ) te atangin an inbuatsaihna te meeting-ah hian tarlan a ni a. Fecilitation Centre atan Kanhmun khua chu ruahman a ni bawk.

Reang(Bru) Mizoram rawn lette awmna khua theuha Administrative Officer leh Village Council aiawhte hian an lo dawnsawn dan tura hriatthiam loh leh zawhna an neihte chu Meeting-ah hian inhrilhfiah nghal a ni bawk.

Meeting-ah hian District Level Core Committee On Reang (Bru) Repatriation Members, Tlawmngai Pawl hrang hrang aiawh bakah an letna tur khua theuh Administrative Officer (AO) leh Village Council aiawhte an tel a ni.