Vawiin chawhnu khan Urban Development & Poverty Alleviation Department hnuaia hmalakna pakhat, Multi-Level Car Parking cum Market & Multi Utility Building, Thakthing venga sak tur chu Deputy Chief Minister Pu Tawnluia, UD&PA department minister ni bawk chuan lungphum a phum.

Deputy Chief Minister Pu Tawnluia chuan Thakthing veng chu veng hlun tak, ram tana mi pawimawh leh thawhhlawk tak tak lo chhuah tawhna veng anih thu sawiin veng mipuiten Thakthing veng huam chhunga sawrkar hmalakna tha taka anlo thlawp tawhnaah leh thawh ho thin naah lawmthu a sawi a, veng thang mek leh lun tak anih angin kawng hrang hranga tangkai taka hman theih tur building sak ani tur chu khawtlang hruaitute leh UD&PA a thawktute inpekna leh thawhrimna fakawm a tih thu a sawi bawk. Pu Tawnluia chuan lungphum phum anih atanga hna thawh zawh thlenga tha taka enpuia vilpui thin turin khawtlang hruaitute leh mipuite a chah a, neitu nihna thinlungpu chunga a building enkawl chhunzawmnaah pawh dim thiama, a nihna tur ang taka tangkai taka hmang turin a chah bawk. Pu Tawnluia chuan Smart City Mission hnuaiah kawng hrang hrangin Aizawl khawpui thawm that hna kalpui a nih tur thu sawiin,” Hmun pawimawh zual hrang hranga CCTV dah te, Utility service kan tih ang tui, electric leh bawlhhlawh paih dan thlengin kan in monitor thei tawh dawn a, mipuiten awlsam zawk a sawrkar an dawr theihna tur Common service centre te leh hmun hrang hrangah wifi hotspot te dah a ni ang,” a ti. Minister chuan UD&PA department leh AMC hnuaia khawpui traffic tawt tih ziaawm nana hma lakna leh mipui khawsak chawikanna tura hma lakna thenkhatte a tar langa, Multi-Level Car Parking Mizoram New Capital Complex te, Multi-Level Car Parking, Ramhlun South, Zodin Square leh Tuikual South-ahte, Community Centre cum Car Parking, Maubawk, Multi-purpose Hall Ramthar, Public Utility Project Chaltlang a sak tur tein chak taka hma lak mek anih thu a sawi.

Vawiin Multi-Level Car Parking Cum Market & Multi Utility Building, Thakthing veng lungphum phumna hun hi Thakthing Zawlbuk ah hman niin Dr C Vanlalramsanga, Secretary, UD&PA in a kaihruaia, Pu C Malsawma, Executive Engineer in technical report pein Pu H Lalnunsanga, Chairman, local council, Thakthing veng in thu sawina hun a hmang bawk a ni. MLA Pu L Thangmawia, Dr ZR Thiamsanga, Pu C Lalmuanpuia leh AMC Deputy Mayor Pu Lalringliana te bakah Thakthing veng khawtlang hruaitute leh UD&PA department a hotuten lungphum phumna hun hi an hmanpui a ni.   

Multi-Level Car Parking Cum Market & Multi Utility Building, Thakthing veng hi UD&PA department kaltlangin cheng nuai 884.73 senga sak tur a ni a, Basement I,II leh III awm tur niin ground floor, first floor leh second floor a awm bawk ang. He buildingah hian LMV 30 leh two wheeler 30 hun theih tura rauhman niin Bazar, Auditorium leh Facilities centre awm tura duan a ni a, thla 24 chhunga sak zawh tura ruahman a ni bawk.