2221/2022-2023
East Lungdar, 7th October, 2022 : Rural Development Minister Pu Lalruatkima chuan vawiin khan East Lungdar-ah Rurban Training Centre-cum-BDO's office a hawng a, "Aizawl Thlai Rate Android App" a tlangzarh nghal bawk. Hrangturzo bialtu MLA, Home Minister ni bawk Pu Lalchamliana'n he hun hi a hmanpui a ni.

Hawnna puala inkhawm Rurban Training Centre-a buatsaihah khuallian Pu Lalruatkima chuan thu sawiin thingtlang khua in hma an sawnna turin scheme hrang hrang kaltlangin Rural Development Department in hna a thawk a, a hlawhtlinna kan hmu chho zel hi a lawmawm takzet a ni, a ti a, SPMRM hi 2016 ah Aibawk cluster ah tan a ni a, kan thawh that vangin cluster dang min pek belh hial a, cluster 4 kan nei tawha, tunah hian thingtlang khua ten khawpui anga hmasawnna ruhrel (infrastructute) an neih ve theihnan kan theih chinah tluang takin kan thawk mek zel a ni, a ti a. State Performance indicator ah India ram pumah pathumna kan ni hial a ni a ti a, Cluster based performance indicator ah Aibawk cluster hi India ram pumah pakhatna a ni bawk a, hei hi kan officer te leh staff te bakah Village Council leh mipuite thawhhona a that vang a ni, a ti a. Kan hlawhtlinna hi mipuite vang a ni a ti.

Rurban Training Centre-cum-BDO's office changtlung tak hawn a ni ta chu lawmawm a tih thu sawiin, khuallian chuan video conferencing room changkang tak kan nei ta hi mipuite leh a hmang tangkai duh apiangten an hmang thei dawn a, BDO office ta bik a ni lova, mitinin mahni ta anga dimdawih leh uluk taka enkawla hman tangkai tum nise a duh thu a sawi a, khawvel hmasawnna kawnga ke kan pen naah vawilehkhatah khawvel dang hmasawnna kan nei nghal vek thei lova, keimahni theihna leh inbuatsaihna nen kalkawpin kan phak chin chinah rualpawl turin theihtawp kan chhuah zel a ni, a ti.

Pu Lalruatkima hian SPMRM, East Lungdar cluster te buatsaih Aizawl thlai rate awlsam taka hriat theihna tur mobile app a tlangzarh nghal a, Google playstore-ah "Aizawl Thlai Rate" tiin download theih a ni ang. He mobile app hmang hian thingtlang loneitute leh bazar duhte bakah a hre duh ten Aizawl bazar thlai rate an hre thei ang a, an thlai thar hralh chhuah kawngah hlawkpuina an neih beisei a ni a, thlai rate hre sa in bazar kan kal thei dawn a, a leitute bakah a zuartute, thlai thartute tan thil tangkai tak a nih ka beisei, a ti.

Pradhan Mantri Awaas Yojana– Gramin (PMAY-G) thingtlang mirethei insak tanpuina chungchang sawilangin khuallian chuan PMAY-G pangngai Awaasoft-ah insak tanpuina dawng thei chhungkaw 13532 an awm a, vawiin ni thleng hian chhungkaw 10532 hnenah first installment, chhungkaw 6615 hnenah second installment, chhungkaw 6373 hnenah third installment leh chhungkaw 5894 hnenah fourth installment pek tawh niin chhungkaw 5999 ten he scheme hnuaiah hian in an sa zo tawh tih sawiin, la sa zo ve lo leh installment la dawng kim ve lo te hnenah hian a chunga tarlan ang hian tanpuina installment hrang hrang pek mek zel a ni a, Central atang fund kan hmuh tluan that theih chuan heng la dawng kim ve lo te pawhin an dawn kim thuai theihnan Sorkar chuan chak takin hma a la mek a ni, a ti a.

Normal PMAY-G bakah hian a belhna (additional) turin kum 2018 khan Awaas+ survey neih a ni a. Chumi atang chuan Central sorkarin target - 6980 households min phalsak leh a. Heng miten insak tanpuina an dawn theih nan hian registration leh Administrative sanction te buaipui mek a ni a. Tun dinhmunah 5381 Household register tawh niin, 2598 household tan administrative sanction software-ah tih fel sak an ni tawh bawk a. Central atanga fund dawn a nih leh velah an ni pawh hian insak tanpuina fund an dawng ve thei dawn bawk a ni, a ti.

Rurban Training Centre cum BDOs Office hi Shyama Prasad Mukherji Rurban Mission (SPMRM) hnuaia Mizoram Technocrats Company, Tuikhuahtlang, Aizawl ten an sa a, cheng nuai 120 senga sak niin, July, 2022 khan sak zawh a ni. Seismic zone V specification a sak niin, chhawng hnih a ni a, ground floor hi 172 sqm niin, first floor hi 128 sqm a ni.

He Training centre-ah hian Training Hall mi 60 chuang len theihna tur awmin, Training pekna tur hmanraw pawimawh Projector leh sound system tha tawk tak vuah nghal a ni bawk.

Hemi bakah hian Online-a training theihna tur Video Conference Centre cum Meeting Room siam niin, he room-ah hian Conference Table bakah Video Conference System changtlung tak dah a ni a. He building hian BDO leh Staff-te tan Office hnathawhna hmun nuam leh hahdam tak a keng tel nghal bawk a ni.

Vawiin inkhawm hi Pu R. Zarzosanga, Secretary, Rural Development department in a kaihruai a, Pi Irene Zohlimpuii Chongthu, Jt. Secretary, Rural Development department in technical report a pe a, Pu H. Lalhruaitluanga, BDO, East Lungdar RD Block in an hnathawh chi hrang hranga hlawhtlinna an neih te sawifiahna hun a hmang a, Pu R. Lalthazuala, Director, Rural Development Department in lawmthu sawina hun hmangin a khar a ni.