BADP sum cheng nuai 25 senga sak Ngur Community Hall chu vawiin chawhnu khan Rural Development Minister Pu R.Lalzirliana’n a hawng.

Hawnna puala programme tawi buatsaihah Khuallian Pu R.Lalzirliana chuan Ngur khuain Community Hall tha tak an nei chu a lawmpui thu a sawi a. Ngur khua chu khaw lian tak nilo mahse khaw inlungrual leh taima tak an nih thu a sawi a. Zofate chu hnam tlemte kan la nih avangin inlungrualna tha kan neih a tul thu leh lungrualna chu ram leh hnam dinchhuahna atana pawimawh tak a nih thu a sawi a. Home Minister chuan remna leh muanna awm theihna turin sawrkarin nasa taka tan a lak thu sawiin, tunhnai maiah HPC(D)-te ne’n  inbiakna kaltlangin remna duhawm tak siam a ni, a ti a. Mipuite pawh remna leh muanna siam kawngah sawrkar thawhpui tlat thin turin a chah a. Remna leh muanna hnuaiah chuan hmasawnna chak taka a awm theih avangin sawrkarin a ngaipawimawha,  vawngnung zel a tum a ni tiin, “Remna leh muanna  tichhe zawnga chete chu sawrkarin a dim dawn lo a ni”, a ti a. Khuallian chuan hruaitu tha ni tura tan lakna tur hrang hrangte sawiin, hruaitu tha ni tur chuan khawtlang leh kohhranah mite kaihruaitu, zirtirtu leh entawntlak nih angaih thu a sawi a. Sawrkar flagship programme pawimawh tak NLUP hnuaiah MLA bial tin atangin Beneficiary mi 400 zel thlan an nih dawn thu tarlang a. Dik tak leh felfai taka a dawng tur dik tak beneficiary-te thlan an anih theihna tura tan la turin a thlangtu turte chu a chah a. Ngur khaw mipuite chu mahni phak tawk aia lan mawi tum lo tur leh zo nun ze mawi tak chhawmnunga, ei leh in hrisel leh nun hrisel zawh  zel turin a fuih a. Community Hall tha tak an  neih chu tangkai taka khaw mipuiten an hman theihna turin duhsakna a hlan nghal a ni.

He hun hi Pu R.Lalramliana, Ngur VC Member chuan a kaihruai a. Pi Rebecca Laldinmawii Hrahsel, BDO Champhai chuan technical report   pein Ngur khaw mipute chu Sawrkar in thingtlang khawmite hmasawnna tura Scheme hrang hrang a siam sakte chhawr tangkai thiam thei turin a chah a. Community Hall thar an neih chu neitu thinlung pu chunga enkawl thin turin a chah bawk a ni. Pu R.Lalbiakchhunga,President, Ngur Branch YMA chuan lawmthu sawina hun neiin hun hi a khar a ni.

Ngur Community Hall hi BADP Sum cheng nuai 25 hmanga kum 2008 atang sak tan a ni a. A dung feet 72 leh a vang zawngin feet 40 a lian a ni.