Vawiin chawhma khan Aizawl District Agriculture Officer Conference Hall-ah  Agriculture Department(Crop Husbandry) leh  Central YMA tangkawp chuan Agrilcuture mithiamte hnen atanga  rannung thahna hlo leh hnimhnah suatna - hlo tur  hmandan tur, hman dan dik leh hman dan him zawk zirtirna chu loneitute, YMA hruaitute leh dawrkai  rannung-hnimhnah tur/hlo zuartute pualin an buatsaih a. He hi hi Agriculture Minister Pu KS Thanga chuan khuallian niin a hmanpui a ni.

Awareness Campaign on Safe & Judicious use of Pesticides Programme hmanpuitu Agriculture Minister Pu KS Thanga chuan mihring pungchho zelah ei leh bar mamawhna a sang chho zela, Mizoramah pawh ei leh bara intodelh tumin theih tawp chhuah mek a nih thu a sawi a. " Mizoram mipui 70% aia tam eizawnna Agriculture sector hi kan sawrkar chuan a ngai pawimawh chhunzawm zel a. Kan kuthnathawktute tihhmasawn, an intodelh dan tur ngaihtuahpui leh an thawhchhuah tihpunsak hi kan development policy lianber pakhat a la ni reng a ni", a ti. Thawhchhuah tihpunna turin kan thlaite a eichhetu lakah venhim a ngai a, chuvang chuan loh theih lohin hlo tur, rannung thahna leh zuva hraina tur chidangte hman a tul hun a awm thin a. Mahse, chu chu hrisellohna thlentu, cancer vei an pun chhan pakhat a ni em tih te zirchian a hun tawh tih a sawi a. Kuthnathawktuten an huanthlai himna tura rannung hraina leh hlobet thahna tur an hmandan te a lo him zawk na tur  leh mihring bakah  leilung tana pawi lo zawnga hmandan inzitir chu thil hmanhmawh thlak a ni tawh a ni a ti. Dawra hralhchhuah thlairah leh thlai hnah te chu cancer thlen thei DDT leh pesticide hlauhawm dang tea chawm a ni em tih te leh mihring tana ei tlakloh a ni em tih te chen in Agriculture Laboratory ah enfiah a tul tawh tih a sawi a. " Agriculture Scientist te chuan hlo tur leh rannung thahna tur te chen hian a hmandan tur aia tak uchuaka hman leh a hmandan dik zawm loa hman a nih chuan mihring hriselna khawih pawi thei tur a ni vek a. Hnimhnah suatna hlo te pawh leiah tawp mai lovin ruahin luiah a len thla leh thin a, hmandan tur aia tak zawka hman a nih phei chuan mihring tana pawi thei tur kan tui tlanah te thlengin a awm thei a. Chuvangin, heng tur te hi hman a tul chang awm mahse  pawlawh taka kan hman chuan keimahni leh keimahni tur in kan inhrai palh thei a. Hemi kawngah hian a bikin hlo tur, rannung thahna tur leh zuva thahna hlo/tur  zuartu dawrkaite an fimkhur a pawimawh takzet a, kuthnathawktu tam zawk Agriculture mithiamte rawn hmasa lova anmahni lo dawr thinturte chu an kaihruai that a pawimawh hle a ni, an mawhphurhna pawh a ni", a ti. 

Rannung thahna hlo leh hnimhnah suatna - hlo tur  hmandan tur, hman dan dik leh hman dan him zirtirna sawihawngtu Agriculture(Crop Husbandry) Director Pu J.Lalzamliana chuan Mizoten tur hrim hrim kan basa ngam chu sim a hun tawh tih a sawi a. "Lui sangha leh nungchate,  savate leh ransa te chen in chemical tur leh hnimhnah atanga tur sawrchhuah te hmangin,  kan ei atan kan hrai duh a. Ramhmul tur - ru leh thildangte pawh hi  nungchaten an thihpui chuan mihring tan pawh a pawi tih kan hriat a ngai a ni. Anihna takah chuan mahni inhrai duh khawpin kan fimkhur lo a ni. Kan ei leh in  tur huanthlai kan venhimna kawngah pawh pesticide hman te a ngaih nachang a awm tlat avangin pesticide hi hmanloh ngawt theih a ni lova, hman dan him leh mihring tan  bakah environment atana pawilo thei ang bera inzirtir nasat kan ngai hle a ni. Hemi kawngah hian Aizawl bakah District tinah zirtirna kan kalpui dawn a ni. ", a ti. CYMA te nen thawhona tha tak an nei chu lawmawm a tih thu sawiin rah tha tha tak a chhuah a beisei thu leh an hmalakna a tih chak sawt an rin thu a sawi a ni.

Thusawitu dang Central YMA President Pu Vanlalruata chuan, " Mizo mipui tlemte, mi nuai sawmpahnih chuang awrh hi kumtin Cancer vang ringawt pawhin mi 700 chuang zet kan thi ziah a. Kan pun chakloh tehlul nen kum khat chhunga kan thi nasa lutuk te pawh hi kan inzirchian deuh chu a ngai a ni.  Zuk leh hmuam emaw ruihtheih thila fihlimlo  te chauh ni lovin engmah tilo ruihlo laka fihlim anga ngaih tam tak ten Cancer an vei leh zel hi kan ei leh in thleng hian a hrisel tawk lo emaw ni chu aw a tih theih a. Kan chawhmeh chawkluhte bakah kan  huanthlai ei te chen hian cancer thlen thei hman phalloh zinga mi  pesticide  hmanga enkawlte a ni em tih te kan chian a ngai tawh a, YMA angin khawtin leh vengtina kan chanchinbuahte hetiang lam hawia kan inzirtir tam deuh pawh a ngai tawh a ni. Kuthnathawktute pawhin a zir a zir chhuah, Agriculture mithiamte sawi anga hma la thin turin kan inchah a.  Hlo tur leh rannung thahna te phei  hi mithiamte rawn hmasa chunga sawngbawl a tha hle ang.  Mizo mipui tlem te hi thi zawih zawih tur chuan kan tlem lutuka, hriselna kawngah leh ei leh ina fimkhurna kawngah te kan tan tlan a, a hria ten hre velote hrilh chhawn zel pawh kan taihmak a ngai a ni", a ti.

Awareness Campaign on Safe & Judicious use of Pesticides Programme-ah hian Agriculture mithiam te - Pu J.Rothanga,MSc Agri(Entomology), Dr.Samuel Lalliansanga, Ph.D Agri(Plant Pathology) leh Pi Lyncy Lalrindiki, MSc Agri(Entomology) te hnen atangin rannung thahna hlo leh hnimhnah suatna - hlo tur  hmandan tur, hman dan dik leh hman dan him zirtirna dawn a ni a. hemi hnuah hian sawihona bakah  zawhna leh chhanna hun hman a ni.

Agriculture mithiamte tarlan dan chuan - Endosulfan, DDT, Ethyl Parathion, Aldrin, Endrin, BHC, Heptachlor, Lindane, Phenyl Mercury Acetate te chu mihring tan leh min hualveltu(environment) tana hlauhawm leh hman loh tur te an ni. 

Pesticide taksa a aluh avanga natna thleng theite chu - Lu na, A dan pangai aia nasa zawka  thlan tla, Hrawk leh hnar za, mit thip, luakchhuak, chauh ngawih ngawihna, ngaihtuahna mumal lo, vun thak, mut theih loh, chaw eitui lo, tui hal huam huamna, taksa chak lo, ruhchuktuah na, nikhawhriatloh, thawk harsa leh rang, khawsik leh  Cancer te a ni.

Rannung thahna hlo(pesticide) hman dan dik chipchiar taka inzirtir a ni a mipui mimir hriattura pawimawh zual te chu - 1. Naupang, ranvulh leh a hmang tur ni lo hrim hrim bul hnaiah pesticide a awm tur a ni lo, 2.  Kah laiin a hma zawnga kal lovin a hnung zawnga kal tur 3. Pesticide kahin darkar 8 aia rei kah leh khawih loh tur. 3. Zingkar leh tlaih kahtur 4. meizuk, thil ei lai leh thli thawt nasat laiin pesticide kah loh tur. 5. Pesticide te chu tur a nih tho avangin inchhungah kah tura buatsaih loh tur 6. Instruction - a hmandan tur inkawhhmuhna ang thlapa pawlh dal leh hman tur a ni.

Awareness Campaign on Safe & Judicious use of Pesticides Programme hi Aizawl District Agriculture Officer  Pu R.Lalnunzira'n a kaihruai a. He hunah hian Agriculture Technology Managment Agency(ATMA) Aizawl District buatsaih Rannung Thahna Hlo Hman Dan tih booklet chu Agriculture Minister Pu KS Thanga chuan a tlangzarh nghal bawk a ni.