4597/2024-2025

Dated Aizawl: the 10 March 2025 : Vawiin chawhma dar 10:00 khan Science Technology & Innovation Hub Mizoram leh Women & Child Development Department tangkawpin an buatsaih, One Day Training for Anganwadi Workers on Health & Nutrition, Ayurveda & Digital Safety chu Rural Development changtu leh Minister of State ni bawk Prof. Lalnilawma chuan Synod Conference Centre, Mission Veng, Aizawlah khuallian niin a hmanpui.

Hawnna hunah hian Minister Prof. Lalnilawma chuan thusawiin, ST&I Hub kaltlanga rawngbawlna hna chu amah pawhin a tuipui hle tih sawiin, Rural Development minister a nih ang pawha mi tin thleng phak hmasawnna leh thiamna chu a thupui ber pakhat a ni tih a sawi a. ST&I lo zik chhuahna atana hma an lo lak dante sawiin, an thawhho pui WCD Department ngei pawh chu MIzoram sawrkar hnuaia Department tangkai ber pawl a nih dante a tarlang a. Kalkhawmte hnenah training chu tangkai taka hmang theuh tura chahin, India ramin kum 2047-a Vixid Bharat (developed India) dinhmun a inhlan kai a tumna kawngah pawh hriselna chu a bulpui ber a ni a ti a. Ram innghahna thalai hrisel nei turin, nute chuan mawh an phur hmasa ber tih a sawi a. Nu ten an fate uluk taka hrisel tura an enkawl phawt chuan thalai hrisel neiin ram hrisel din theih ngei a beisei tlat tih a sawi a ni.

Hawnna hunah hian khualzahawm Pi Zoramthangi Chhangte, Director WCD leh Special Guest Prof. Raghu Raman, Principal Investigator STI Hub te chuan an telpui a. Dr. Baby Zaithanpuii Hmar, Co-PI STI Hub chuan inlawmna thu sawiin, thutiam chham rual nghal a ni a. Pi Janet Lalremruati, Project Coordinator chuan lawmthu sawiin training hun hi a khar a ni.

Training-ah hian Tlangnuam Block huamchhunga Anganwadi Workers 80 chuang an kalkhawm a. Hun hniha then niin, Thupui hrang hrang hmangin STI Hub Project Staff te chuan zirtirna an pe a ni.

Hun khatnaah hian Pu Lalramthara, Food & Nutrition Team hnen atangin Nutrition leh a pawimawhna chungchang zirho a ni a. Dr. Lalrinhlui, Ayurveda Team chuan nu leh naupangte tana nitin hun hman dan tha leh hrisel (Dinacharya) hmangin zirtirna a pe bawk.

Hun hnihnaah DL&AAA Team atangin Pu Lal Sangzuala'n phone leh internet atanga naupangte him loh theih dan leh invenna tur chungchang zirtirna a pe a. Pi Baby Lalruatfeli, Food & Nutrition Team chuan kan ban phaka chaw tha awm hman tangkai dan zirtirna a pe bawk a ni.

STI Hub Mizoram hi Mizoram University leh Amrita Vishwa Vidyapeetham, Kerela te tangkawpin an enkawl a ni a. Mizorama Tribal te kawng hrang hranga tihhmasawnna tura din niin, STI hnuaiah hian team hrang hrang pali- DL&AAA, Food & Nutrition, Ayurveda & Health leh Agro-forestry-te an awm a ni.