4598/2024-2025

Aizawl dated 10th March 2025: Vawiin chawhnu khan Aijal Club Park-ah Urban Development & Poverty Alleviation Department buatsaih,’Sanjha Utsav (SHG Mela) Festival of Togetherness’ hawnna hun hman a ni a. Pu K.Sapdanga, Minister, Urban Development & Poverty Alleviation Department chuan ni 5 awh tur Self Help Group Mela hi khuallian niin a hawng.

Khuallian Pu K.Sapdanga chuan Self Help Group Mela hawnna hun ah hian UD&PA Department kaltlanga khawpui chhunga chhungkaw khawsak dinhmun chawikan nana nu hovin an theihna leh thiamna chhungkhawma a huho a hma an lak thinna chu lawmawm a tih thu a sawi a. Hmasawn duhna leh hlawhtlin tum tlatna thinlungpu chunga tum ruhna nen a beitute tha tichaktu Department enkawltu nih chu phurawm a tih thu sawiin ram pum huap exhibition buatsaihna a Mizoram atanga UD&PA enkawl SHG thlanchhuah an ni te chu lawmawm a tih thu a sawi. UD&PA Minister chuan SHG-te tihmasawn zel tur hian UD &PA Department thawktute chu an inpeih reng thu tarlangin hetih rual hian SHG-ten an tih ve tur, loan rulh ngaih pawimawh te, an hmalak dan tur ruahmanna felfai siam te leh thawhhona boruak tha siam te hlenchhuak zel turin a fuih bawk a ni.

UD&PA Minister chuan ram leilung hausakna humhalh nan leh khawtlang fai leh thianghlim siam tur chuan vawi khat hman plastic hman loh ngam a pawimawh thu sawiin he SHG Mela-a Selh Help Group member tel te leh a chhimtu zawng zawngte chu vawi khat hman plastic tihtlem kawng a hma latu leh midangte zirtirtu nih tum theuh turin a chah bawk a ni.

‘Sanjha Utsav – Festival of Togetherness’ hawnna hun ah hian Pu Lalmalsawma Pachuau, Secretary, UD&PA chuan kalkhawmte lawmna thu a sawi a. Pu Jacob Lallawmpuia, Director chuan report a pe a ni. SHG Mela hawnna hun ah hian SGH hma la tha panga; Chawngtinleri SHG, Jenny SHG, Mass SHG, Nui hiau SHG leh Sari SHG-te hnen ah lawmpuina thilpek hlan a ni a. Mela hi March ni 10 atanga ni 14 thleng neih a ni dawn a, SHG kutchhuak thil chi hrang hrang phochhuahna stall 27 leh eitur zawrhna stall 7 a awm a ni.

Report-a tarlan danin Mizoramah kum 2014-15 Financial year atang khan District headquarters leh Census town thenkhatte nen khaw 15-ah Deendayal Antyodaya Yojana – National Urban Livelihood Mission (DAY-NULM) hi kalpui mek a ni a, Self Help Group 1520 an awm mek a ni. DAY-NULM hnuai ah hian Social Mobilisation & Institutional Development, Employment through Skill Training & Placement, Skill Development Training, Self Employment Programme leh Support for Urban Street Vendors-te kalpui thin a ni a. Tarlan danin ‘Skill Training’ paltlang a, Certificate felfai tak nei mi 10733 zinga mi 5158-te chuan an thiamna zirchhuah hmangin hna an chelh mek a. Self Employment Programme hnuai ah hian mimal leh a huhoa, eizawnna bultanna tur leh tihchangtlunna tur, Bank atanga loan la 2024 an awm tawh a ni. North East leh Himalayan Region zinga DAY-NULM hnuai a hma la tha State thlanchhuahna ah Mizoram chuan kum 2021-22 leh kum 2022-23 khan Systematic Progressive Analytical Real Time Ranking (SPARK) Award lawmman pakhatna a lo dawng tawh bawk a ni. DAY-NULM kal lai mek chu kum 2024 September khan tihtawp a ni a, a thlakna tur ‘New Mission on Urban Poverty Alleviation’ chu Ministry lamin duang fel tawhin chumi tur atan chuan October 2024 atang khan India ram khawpui 25-ah Pilot Project kalpui mek a ni a, Aizawl pawh hi a tel ve mek a ni.