Vawiin chawhma khan Mizoram University Conference Hall, Tanhril ah India hmarchhak state pariat (8) ten ni hnih awh Regional Workshop under Pradhan Mantri Awaas Yojan-Gramin (PMAY-G) hawnna hun hman a ni a, Pu Lalruatkima, Minister of State for Rural Development department in he hun hi a hmanpui.

Minister Pu Lalruatkima chuan hun engemaw chen PMAY(G) chu Mizoramah kalpui anih loh hnuah Ministry of Rural Development, Rural Development Department Mizoram leh NIC team a thawktute hmalakna leh thawhrimna zarah State Nodal Account siam niin hna pawh chak zawka kalpui ani leh tur chu lawmawm a tih thu a sawi. Minister chuan mipuite khawsak chawikan nan sawrkarin Socio-Economic Development Project a kalpui tur ah PMAY(G) chu hmanraw tangkai tak tur anih thu a sawi a Mizoram a PMAY(G) hamthatna dawngte insak tha tak tak te chu khawtlanga tlawmngai pawl te tha thawhna leh kaihhruaina vang anih tel thu a sawi bawk. Pu Lalruatkima chuan Mizoramah PMAY(G) chu duh anga kalpui anih theih loh nachhan bulpui ber chu SECC 2011 rintlak tawk loh vang anih thu a sawi a, a dawng awm tak tak dawng ta lo an awm phah thu a sawi bawk a ni. He harsatna tih ziaawm nan Mizoram sawrkar chuan Parmanent wait list a buatsaih a, amaherawh chu Ministry lama thlitfimna a paltlang theih loh thu Minister chuan a sawi bawk. Pu Lalruatkima chuan tun hnai a Pu Amarjeet Sinha, Secretary, MoRD nen an inkawnnaah Mizoram tan PMAY(G) hamthatna dawng thei mi 4000 thlan belh phalna a pek thu a tar lang bawk.

Vawiin workshop hawnna hun hi Pu Lalhmingthanga, Commissioner & Secretary, Rural Development department in a kaihruaia Pu Gaya Prasad, DDG (RH) leh Pu Prashant Kumar, AS (RH), Govt. of India ten thu sawiin India hmarchhak state a PMAY(G) kalpuina kawnga hmasawnna inhrilh tawn nan leh harsatna awm te sutkian dan tur sawi hona hun tangkai taka hmang turin duhsakna an hlan bawk a ni. He workshop ah hian Assam, Arunachal Pradesh, Mizoram, Meghalaya, Manipur, Tripura leh Sikkim atang tein an rawn tel a ni.