111/2025-2026

Dated Aizawl: the 9th April, 2025 : Vawiin chawhma dar 10:00 khan Rural Development changtu Minister Prof Lalnilawma chuan Assembly Annexe Conference Hall, Aizawlah Rural Development Department hnuaia scheme hrang hrang kalpuite thlirletna (review meeting) chu khuallian niin a hmanpui.

Khuallian Minister Prof. Lalnilawma chuan kalkhawmte hmaah hian thusawiin, Rural Development chu mipuite nena inngheng hnai ber pawl an nih avangin Department pawimawh tak a ni tih a sawi a. Officer kalkhawmte chu an hnathawhna hmun theuhvah mipuite nena inlaichinna tha leh bialtu MLA te leh Minister-te nen a inhriatthiam tawnna nen a hna thawk thin tura chahin Ram leh hnam hmasawnnna turah chuan huaisen taka kal thin turin a fuih a. Sawrkar chuan Department hrang hrangte thawhhona (convergence) chu a ngaipawimawh hle tih sawiin, chumi lamah chuan Officer-te pawh, a theih ang anga thawkho tlang zel thei tura ngaihtuahna seng thin turin a sawm nghal bawk a ni.

Review Meeting hi Pu V Lalengmawia, Additional Secretary, RD chuan kaihruaiin kalkhawmte lo lawmna thu a sawi a. RD schemes hrang hrang: SAGY/DISHA-te, PMAY-G leh BADP/VVP II-te, PMKSY-WDC, leh MGNREGA chungchangte presentation ngaihthlakho a ni a. Hemi zawh hian District hrang hrang Project Director leh BDO-te hnen atanga presentation ngaihthlak chhunzawm niin, hei hi scheme kalpui zel dan tur sawihonain a zui a. Pu Denny Lalchhuanawma, Under Secretary, RD chuan lawmthu sawiin Meeting hi a tihtawp a ni.

Review Meeting-ah hian District hrang hranga Project Director leh BDO-te bakah Rural Development Department hotute leh mi pawimawh dangte an tel kim hle a ni.