112/2025-2026

Aizawl, the 9th April, 2025: Mizoram Pollution Control Board (MPCB) leh Directorate of Women & Child Development-te tangkawp chuan vawiin khan I&PR Auditorium, Aizawlah Poshan Pakhwada 2025 denchhenin hman khat daih plastic nuaibo chungchang inzirtirna ‘Workshop on Elimination of Single Use Plastics’ an buatsaih a. Aizawl khawpui chhunga College zirlaite leh Higher Secondary School zirlaite telin workshop hlâwkthlâk tak hman a ni.

Workshop hi MPCB Environmental Engineer (EE) Pi PC. Lalmuanpuii chuan kaihruaiin, MPCB Chairman Pu Liankima Lailung, IFS (Rtd.) leh Directorate of Women & Child Development-a Joint Director Pi Zonunpari Sailo-te’n thu an sawi a. MPCB atangin Programme Officer Pu Benjamin Lalnunsanga Colney leh Asst. Environmental Engineer Pu Fabian Ramthansanga te hnên atangin Power-point presentation thlîr hova zirtirna ngaihthlâk a ni a. Sawrkâr laipui hnuaia Mission LiFE chungchâng leh hmankhat daih sarâng leh plastic ho that lohna leh a tihrêm dân turte uluk taka zir ho a ni.

He Workshop-a kalkhawmte hian Mission LiFE chungchângah Cyclist, Asia & India Book Records Holder Pu Vanlallawmzuala Varte kaihhruaiin thutiam an la nghal vek bawk.

Poshan Pakhwada (Nutrition Fortnight) hi kum 2018-a Prime Minister-in POSHAN Abhiyaan (National Nutrition Mission) a hawn zawh atang khân kumtin March leh April-ah hman thin a ni a, tun tum hi a vawi 7-na a ni.

Poshan Pakhwada ruahmanna hi Ministry of Women & Child Development-in siam hmasain hemi zûlzui hian State tinte’n Activity Calendar an duang leh thin a. Thupui bîk neiin kalpui thin a ni a, department hrang hrang, School, College, YMA, Kohhran Thalai Pâwl leh adangte nena hman ho thin a ni. Kumin hian April ni 8 atanga ni 22 thleng hmang tur Activity Calendar siam a ni bawk.