113/2025-2026

Aizawl, the 9th April, 2025: State Council of Educational Research and Training (SCERT), Mizoram buatsaihin April ni 8-9, 2025 chhung hian INSPIRE Awards MANAK dawngtute tan State Level Exhibition and Project Competition & Mentoring Workshop chu SCERT Conference Hall, Aizawlah neih a ni.

State Level Exhibition and Project Competition & Mentoring Workshop kharna programme, Pi Zoramthangi Ralte, Joint Director, SCERT kaihhruaiah Khuallian Pi Caroline Zoramthangi, Director, SCERT chuan National Level intihsiaknaa tel thei zirlai naupangte chhuanawm a tih thu a sawi a. Ram pum huapa langpha ngei tura theihtawp chhuah turin a fuih a ni.

He hunah hian zirlai award dawngtu naupang panga (5) Hmangaihsangi, Class- VIII, Neuhof English Medium School, Chanmari, Aizawl; Timothy Vanlalhmangaihsanga, Class VIII, St. Maria M/S, Kolasib District; Miriam Lalduhawmi, Class IX, Lal Thanhawla High School, Serkhan, Kolasib District; Lalrinmawia, Class IX, Lal Thanhawla High School, Serkhan, Kolasib District leh Joel Lalruatkima Mualchin, Class VI, Don Bosco School, Lawngtlai District te'n an model siam an entir a. Heng Awardee-te hi National Level Exhibition and Project Competition, New Delhi-a neih turah an tel dawn a ni.

He hunah hian zirlaite thil siam tihchangtlung dan tur kawng kawhhmuh turin mithiam tak tak, Pu PC Lalrintluanga, Science Consultant, SCERT; Pu PC Lalngilneia, MISTIC leh Dr. H. Lalhmingsanga, Associate Professor, NIT, Mizoram te chu mentor atan hman an ni.

INSPIRE Awards MANAK atan hian SCERT, Mizoram hi State Nodal Office niin, kum 2010 atang khan he scheme hi a lo buaipui tawh a ni. Pawl 6 atanga pawl 10 zirlai naupang zawng zawngte tan online a dil theiha ni a, he AWARD hian Certificate leh Rs.10,000/- a kengtel a ni.

He exhibition-ah hian zirlai naupangtinte'n an suangtuahna hmanga Science & Technology hman tangkai theih dan turte an duang chhuak a, a lem (model) siam chhuakin, exhibition-ah an pho chhuak thin a ni. Awardee-te hian National Level-a an tih that dan azirin SAKURA Programme, Japan rama neihah an tel leh thin a, Mizo naupangte pawh an lo tel tawh a ni.