114/2025-2026

New Delhi, the 9th of April, 2025: New Delhi a cham mek Pu Lalnghinglova Hmar, Minister of State, Tourism Department chuan tukin khan Pu Gajendra Singh Shekhawat, Union Minister for Tourism chu New Delhi-a a chenna inah a hmu a, Mizoram tourism hmasawnna tura hmalak mekna bakah hmathlir a neihte sawiin an inkawm.

Pu Lalnghinglova Hmar chuan Mizoram in tourism ah ‘potential’ sang tak a nei a, a bikin eco-tourism leh adventure tourism-ahte India hmunpui ni tur khawpin theihna a awm thu Union Minister a hrilh. “Hun rei tak chhung Mizoramah tourism potential a awm thu sawi a lo ni tawh thin. Tunah chuan theihna a awm thu sawi ringawt lovin, potential haichhuak turin a tak taka thawh kan duh, ” a ti a. Mizoram tourism hmasawnna tura a hmathlir tihhlawhtlin kawngah Central sawrkar leh, a bik takin Union Tourism Minister puihna a la mamawh dawn chauh tih a sawi bawk.

Mizoram Tourism Minister chuan kum 2024 ah tourist nuai nga chuangin Mizoram an tlawh a, chu chu official state population atangin 50% deuhthaw a nih thu Union Minister a hrilh a. Tun atanga hun rei lo teah Sairang thleng rel a luh tawh dawn avangin tourism hmasawnna kawng a inhawng zau sawt tih a sawi bawk.

Union Tourism Minister Pu Gajendra Singh Shekhawat chuan Mizoram-a tourism hmasawnna’n theihtawp a chhuah pui tur thu Pu Lalnghinglova Hmar chu a lo hrilh a. Tourist tam zawk hip thei tur chuan hmunhma neih that piah lamah state sawrkar leh mipuite inbuatsaih a, rilru sukthlek thlenga inhawn a tul thu a sawi.

Union Minister chuan project lian tham leh rotling zel siam thin a țul thu leh, private investor-te thawhpui uar turin Mizoram Minister chu a lo râwn bawk a; sorkar laipuiin tourism sector-ah SASCI atangin sum țhahnem zawk dah a tum thu leh an ngaihtuah mek thu a sawi bawk.