1492/2023-2024

14.8.2023 : Vawiin khan Rural development Minister, Pu Lalruatkima chuan Ministry of Rural development hnuaia official te dawrin Mizoram mamawh te a thlen a, Ministry of Rural development, GOI hnuaia Rural Housing lam changtu Deputy Director General (RH) Pu Gaya Prasad chu a pisa ah hmuin inkawmna hun tha tak a neihpui a, he an inkawmna ah hian Mizoramin a mamawh mirethei leh harsa zawk te tana insak tanpuina (Rural Housing) chungchanga harsatna tam tak Mizoramin a tawhte sawipuina a nei a, Deputy Director General hian tun kar chhungin Mizoram tan Rs. 60 Crore releaseda nih nghal tur thu RD Minister hi a lo hrilh a ni. Deputy Director General (RH) hian Mizoram chu Rural Development Minister tha tak leh chak tak, mahni hna a in pe zo tak a neih avanga lawmawm a tih thu leh duhsak tlak a nih thu a sawi bawk a ni.

Vawiin vek khan Pu Lalruatkima, RD Minister hian Pu Amit Kataria, Joint Secretary, Ministry of Rural Development, MGNREGA(s) Ni 100 inhlawhna changtu pawh a pisa ah kawmna hun a nei a, Joint Secretary, GoI hian Mizoram chu Ni 100 inhlawhna a an tih that thu leh India ram State lian tak takte tan pawh entawn tlak a nih zia a lo sawi a, Pu Amit Kataria pawh hian Mizoramin Minister viak tha leh mahni hna a inpe zo takin Rural Development Department a enkawl avanga hnathawk tha leh dinhmun sang tak Mizoramin a thlen theih phah thu a sawi bawk a ni. Pu Lalruatkima, RD Minister hian Ministry lamin Mizoram an duhsakna ah lawmthu a hrilh a, Mizoram mamawh te Joint Secretary hi a sawipui nghal a, Joint secretary chuan tunkarah Mizoram mamawh ang Ministerin a thlen te chu rawn tih ngei a tum thu Minister hi a hrilh nghal bawk a ni. Pu Amit Kataria hian Mizoram chu tehna hrang hranga (Perimeter) India ram State te zingah a ti tha ber pawl a nih avangin State in a mamawh ang tih sak vat vat hi a phurawm thu a sawi a, hmalam hunah pawh inthlahrung hauh lova mamawh te a bula thlen zel turin a chah bawk a ni. RD Minister hian Joint Secretary hi Mizoram State Assembly Election hma ngei a rawn tlawh tura a sawm angin, Joint Secretary pawhin rawn zin ngei a tum thu Minister hi a hrilh bawk a ni. Hemi piah lamah hian Azadi ka Amrit Mahotsav hnuaia hmalakna Amrit Sarovar Mission ah Mizoram chuan hna athawh that em avangin, tun Independence day hman turah pawh hian RD Department hnuaia official 4 (pali) lai mai sawm bikah rawn neiin, delhi I-Day hmanna ah an tel bawk dawn a ni.

RD, Ministerin Ministry a dawrna ah hian Ni 100 inhlawhna kalphungah Aadhar Card neilote chu inhlawhna an pek ve theih tawh dawn loh thu Ministry lam hian an lo hrilh a, hei hi a rang lama hma an rawn lak tur thu an lo hrilh bawk a ni.

Minister hi Pi Ethel Rothangpuii Joint Secretary, Rural Development Department-in a tawiawm a ni.