298/2023-2024

Aizawl, the 3rd May 2023: Ni-2 awh tur Rural Development Department buatsaih ‘Sensitization Training on Government Accounting and Office Procedure’ chu RD Directorate Conference Hall-ah vawiin khan Minister Pu Lalruatkima chuan khuallian niin a hawng.

Hawnna inkhawmah hian Rural Development changtu Minister Pu Lalruatkima chuan office kalphung leh IFMIS (Integrated Financial Management and Information System) chungchang training buatsaih a ni chu lawmawm a tih thu a sawi a, sawrkar hnathawk hlawh leh bill zawng zawng IFMIS kaltlanga pekchhuah a nih tawh avangin training chu a pawimawh hle a ni, a ti.

Minister chuan khawvel changkang zelah thiamna pawh a sang chho zel a, computer hmangin engkim tih a nih tawh avangin thawktute pawh inzirthar a, intahhriam reng a ngai a ni, a ti a. ‘Mihringte chu zirtawpni nei lo, zir reng tur kan ni’ tiin hriatloh chu a zahthlak lo a, hre zawkte rawn hreh lo turin leh a hre zawk te pawh chu hrilhhretu a tang fo turin Minister chuan a duh thu a sawi a ni.

Khawvel hmanhmawh tawh takah awlsam zawk a hnathawh a nih theih nan thawktute pawh in her rem ve zel a ngai a ni tiin khuallian chuan rilru leh taksa chhawr thiam a pawimawh a ti a, a bikin RD Department chu sum che vel a tam hle a, tihsual palh laka inven leh chak zawka hmalak nan sawrkar in IFMIS a chhawpchhuak chu a tangkai lehzual dawn a ni, a ti. Office kalhmang leh dan hriat chian loh chuan chetsual palh a awl tiin training chuan rah tha a chhuah ngei a beisei thu a sawi bawk. Khuallian chuan eng department-ah pawh awm se pisa kalhmang hria leh thiamte chu chhawr ber an nih thin thu leh an tangkai thu tarlangin training chu hlawkpui taka an hman theuh a duhsak a, thahnemngai tak leh uluk taka training nei turin kalkhawmte a chah a ni.

Minister chuan Rural Department Department-a thawkte chu fakin hripui leng karah ramchhunga MGNREGS (ni-100 inhlawhna) titha ber pawl an nih thu te, MIS (Management Information System) felfai tak an enkawl thu leh project hrang hrang a an hlawhtlinna te chu thawktute thawhrim vang a ni, a ti a. Hmalam hunah pawh rahbi thar kai zel thei turin lungrual taka thawk leh tang ho turin a fuih nghal a ni.

Vawiin hawnna inkhawmah hian RD Director Pu R. Lalthazuala leh Joint Director Pu K. Lalhmuakliana pawhin thusawina hun an nei bawk a ni.

Training hi ni-2 chhung awh tur niin office kalhmang chungchang inhrilhhriatna leh intuaihriamna bakah IFMIS practical a khawih dan te leh leh interaction session-te neih a ni dawn a ni.