299/2023-2024

Kolasib dated 3rd May 2023: Vawiin chawhma khan DRDO Conference Hall, Project Veng, Kolasibah ‘District Level Committee on Disability’ chuan thutkhawmna an nei a. Pu John LT Sanga, Deputy Commissioner chuan thutkhawmna hi kaihruaiin ‘Rights of Persons with Disabilities Act 2016’ hnuai a rualban lote chanzo hrang hrang sawi zauna hun leh heng chanvo te hi an dawn theih nan hmalak dan turte sawi a ni.

Pu John LT Sanga, Deputy Commissioner chuan khawtlang hmasawn leh nuam awm tur chuan a chhung a chengte intluktlang leh ralmuang a an awm a tul thu sawiin kum upa lam leh rualban lote chu ngaih pawimawh an tul thu a sawi a. Taksa leh rilru lam a harsatna avanga nunphung pangai zawh thei lo, rualban lote tan Sawrkarin ‘Rights of Persons with Disabilities Act 2016’ kaltlanga chanvo hrang hrang a siamte tih hlawhtlin a nih theih nan thutkhawmna chu neih a nih thu a sawi.

Thutkhawmnaah hian ‘Rights of Persons with Disability Act 2016’ sawi zauna hun neih niin he dan zulzuia hmalak tawh dan leh hmalak chhunzawm dan turte rel a ni a. Social Welfare & Tribal Affairs hnuai a National Social Assistance Programme kaltlanga tanpuina pek chhuah theih zat Kolasib district tan 49 chiah bituk a nih laiin dilna 127 a luh tawh thu tarlan a ni. Sawrkar pisa, Hospital, Biak in leh School-ahte pianphung a rualban lote tan chuankai a awlsam zawk nan kailawn leh ban vawn siam ngai pawimawh tur a ngenna siam te, hna lak dawn a rualban lote tan a 5% hauh sak chungchangte, enkawlna bik mamawhte tan chhawmdawlna dil sak leh Sawrkar laipui scheme hrang hrang kaltlanga hmathatna an dawn theih dan turte sawi ho a ni a. Hna leh hmathatna hrang hrang an dilna kawng a lehkha pawimawh ngaite chu District Hospital atangin dil theih a nih thu sawi a ni bawk.