300/2023-2024

Champhai, the 3rd May, 2023: Champhai District chhunga leichi lakluhte thlithlaia dan ang taka hralhchhuah a ni em tih leh, dan lova tawlh ruk a awm em tih endik tura Sawrkarin a din, Champhai District Vigilance Committee on Fertilizer chu vawiin chawhma dar 11 khan an Chairman Pu James Lalrinchhana, District Bawrhsap hovin DC Conference Hall-ah an thukhawm.

Pu James Lalrinchhana chuan Loneitute'n hlawk zawka buh leh thlai an thar chhuah theih nan an duhkhawp leichi man tlawm zawka an lei theihna tura ruahmanna siam a tul thu a sawi a. Loneitute hamthatna chu District Vigilance Committee on Fertilizer kutah a awm thu sawiin, an tana committee din a nih tih hriaa theihtawp chhuah tum theuh turin member tinte a sawm a ni.

Member Secretary Pi R.Lalramhluni, DAO Champhai chuan Sawrkar laipuiin loneitute hmakhua ngaiin man tlawm zawka leichi an lei theih nan subsidy a siam sak thu sawiin, hemi avang hian cheng vaibelchhe tel teh meuh a seng thin a ni, a ti a. Buh leh bal hlawk zawka thar a nih theih nana hmalakna a hlawhtlin theih nan leh leichiin loneitute kut ngei a thlen a, a nihna tur ang taka hman a nih theih nana inkaihhruaina tha tak siam a pawimawh thu a sawi a. Theihtawp chhuahin 2021 ah hma thar lak niin, farmer's card hmanga leichi pek chhuah tan a nih thu sawiin, hralh chhawn leh a awm loh nana enzui a tul thu a sawi bawk.

Meeting-ah hian loneitute'n an tana lo thleng a ni tih an hriat a pawimawh thu leh hemi kawnga inzirtirna pek dan turte sawiho a ni a. Leichi lo thlen hunah a lo thlen zat leh, allotment neih dante loneitute hrilhhriat zel dan turte ngaihtuahho a ni a. Khawtin tana mamawh angte siamrem ni se, a hmang tangkai tur takte chauhin an hmang ngei a ni tih finfiah nan leh a putru thin ven nana hmalak ni se tih a ni a; a nih dan tur ang takin hmalak a ni em tih enfiahpuia tawiawm turin YMA te phungbawma sawm ni se tih a ni a. Remchang hmasa berah Approved Dealer-te kokhawma meeting neihpui ni se tih a ni a. Champhai khawpui leh a chehhvel bakah thingtlang lam thlenga mamawhna phuhruk a nih theih nan dealer-te chanpual siam fel a ni bawk.

District Agriculture Office, Champhaiin tunhnaia zirchianna a neihin a tarlan dan chuan Champhai khawpui huam mai bakah khaw 43 ahte agriculture sector, thingtlang leh phai lo nei an awm a; heng bakah hian horticulture sector hnuaia huan nghet nei an awm nual bawk a ni. Lei hanna kum tina lo da ve zel avang leh duhkhawp leichi hmuh tur a awm loh avangin buh leh thlai chin a hlawk lo zel a, eizawnna danga insawn an awm chho mek zel a ni. Champhai leilet hectare 593.36 a zau pawh leichi duhkhawp hmuh loh chuan buh leh bal hlawk takin a thar chhuah theih tawh meuh lo a ni.

Kumin Kharif season April thla bik atan hian Mizoram chuan Sawrkar laipui atangin Brahmaputra Valley Fertilizer Corporation Limited (BVFCL) Company kaltlangin quata Urea Metric Ton 2,000/Quintal 20,000 subsidised rate-in a dawng a. Heng zinga Quintal 2833.2/bag 6296 (bag khat kg 45 ang zela chhut) hi Champhai District tana ruahman a ni. BVFCL company kaltlanga Champhai District tana leichi supply tura pawmpui approved dealer 4 te chu chanpual quintal 708.3 (bag 1574) theuh pek an ni.

He hunah hian District Vigilance Committee on Fertilizer inkaihhruaina leh hmalak dan turte, dan tlawhchhan hrang hrangte zirho a ni a. Loneitute hmakhua ngaiin dan lova leichi lakluh, kawl leh tawlhruk ven kawnga tanlak zel a tul thu tarlan a ni a. Approved dealer nilo te, State dang leh District dang qouta leichi tawlhte chu man zel tura tih niin, District qouta-te pawh hmun danga tawlhruk a nih loh nan thlithlai nise tih a ni a. Champhai District Vigilance Committee on Fertilizer chuan leichi phurh, kawl leh zawrh chhuah chu Sawrkar pawmpui approved dealer-te tan chauha tih a nih thu leh, ruat bik nilo tena lo tih ve ngawt chu danin a khap tlat thu a tarlang a. Dan pawisa lova ti lui man chhuahte chungah dan anga hremna lekkawh theih a nih thu a tarlang bawk.

Meeting-ah hian Addl. DC Pu M.Misael, Addl. SP Pu Lalmalsawma Hnamte, Fertilizers Inspector & ADAO Champhai Pi Lalzarzovi; Assam Rifle Champhai OC Maj Seemant Singh leh member dangte an tel a ni.