No.2598/2021-2022

Aizawl, 14th October, 2021 : Rural Development Minister Pu Lalruatkima’n vawiin khan DRDA Conference Hall, Aizawlah kar khat awh tur "State Level Mahatma Gandhi NREGA Social Audit 'Jan Suwayi' and Awareness Week" a hawng. He hun hi India ram in Zalenna a hmuh kum 75-na lawmna Aazadi Ka Amrit Mahotsav' kal zelah Social Audit Unit, Mizoram a buatsaih a ni.

Pu Lalruatkima Minister chuan Social Audit pawimawhzia sawiin Rural Development Department hnuaia hnathawh hrang hrangte langtlang tak leh mipui tan chhawrnahawm lehzual a kan thawh theih nana pawimawh berte zinga mi; Department dang a awm ve lo Social Audit Unit kan neih hi thil tangkai leh tha tak a ni a ti a, Social Audit Unit te hmalakna in vantlang rorel (Gram Sabha) kaltlangin kan hnathawhte kum khatah vawihnih Audit ziah kan nih avangin Official-te leh hnathawktute inthlahdah tur min veng tlat hi kan vannei hle a ni a ti a. Dik tak leh langtlang taka hnathawh a nih zel theihnan Social Audit chu a pawimawh tak zet thu a tar lang bawk.

Minister chuan tha deuhin hna kan thawk a, mahse a inziahfel lamah kan inthlahdah leh deuh thin tih sawiin hemi kawngah hian tan kan lak nasat lehzual a ngai a, audit hunah harsatna hote a min thlen thei tu a nih tih kan hriat a pawimawh a, SAU pawh tangkai lehzuala hmang turin tan kan lak thar leh a ngai a, SAU a tel tlawmngai pawlte pawhin theihtawpin tan min lakpui a ngai a ni, a ti.

He programme hi Pu Lalhmachhuana MCS (Rtd) Director, Social Audit Unit in a kaihhruai a, Pu R. Zarzosanga IAS, Secretary, RD Department pawhin thusawina hun a hmang a. Pu Ngulzathuama MCS, Asst. Director, Social Audit Unit in Social Audit pawimawhna leh kalpui dan hrilh fiahna power point presentation hmangin a nei bawk a ni.

Social Audit Unit hi kum 2012-a din a ni a. Vawiin thleng hian khua 2192-ah social audit neih a ni tawh a ni. Kumin 2021-2022 bikah hian khua 237-ah social audit neih a ni tawh bawk. Social Audit Unit hian social audit hi MGNREGA, PMAY-G leh NSAP-ahte hian audit an kalpui mek a ni.

He hunah hian Rural Development Department a mi pawimawhte an tel kim hle a; NGO - CYMA, MUP, MHIP leh Village Council aiawhte pawhin an tel pui a ni.

Chawhma leh chawhnu hun hman niin, Social Audit lama mithiam bik -Resource Person hrang hrangte atangin thupui pawimawh tak tak; Social Audit kalpui dan leh a pawimawhnate inzirtirna hun hman a ni bawk.