No.2599/2021-2022
Aizawl, the 14th October 2021: Vawiin khan 3rd Bn. MAP Ground, Mualpuiah Home Minister Pu Lalchamliana chuan Mizoram Police Service Association (MPSA) khawmpui lian vawi 12-na chu khuallian niin a hmanpui a. Home Minister hi Chief Secretary Pu Lalnunmawia Chuaungo leh Pu John Neihlaia, IGQ(HQ) & Acting DGP ten an tawiawm a ni.

Home Minister Pu Lalchamliana chuan Covid-19 hrileng avanga Mizoramin hun harsa a paltlang mek lai hian Mizoram Police te tangkai zia leh thawhhrimna mipuiin kan hre chiang thar leh a. Ramri avanga buaina a chhuah takah phei chuan state dang police te khaikhina tlem zawk fe ni mahse, Mizoram Police inpekna leh huaisen zia te kan hmu chiang em em a. Mizoram mipui ten kan thlamuan pui a, Mizoram leh Mizo mipuite zahzawmna humhim tura an inpekna ropui tak avangin kan chhuanga, an chungah lawm kan sawi a ni a ti.

Police mamawhna a san rualin Covid-19 hrileng avanga India ram pum huap anga sum leh paiah harsatna tawh a nih avangin Police hnaruak hnawhkhah ngai, la hnawhkhah theih loh sang tel teh meuh a awm tih a sawi a. State chhung ralmuanna atan te, dan leh thupek kenkawh kawngah harsatna liantham a awm loh nan sawrkar chuan Police hnaruak hnawhkhah chu a ngai pawimawh em em a. Covid-19 hrileng a zia awm hunah leh sum leh paia kan state dinhmun a ziaawm hret hunah heng police hnaruak te hi hnawh khat turin Home Department chu a in peih sa reng tawh a ni a ti.

Home Minister chuan ramri venhim chu sawrkar thil ngaih pawimawh ber pakhat a nih avangin Vairengteah Mizoram Police Company khat dah tum a ni tih a sawi a. Hemi senso atan hian Rs 223 lakh pawh ruahman fel a nih tawh thu a sawi bawk a ni.

Home Minister chuan MPS Officer te fuihna thu sawiin Mizoram Police atana a banpui leh dinhmun pawimawh ber chelhtu an nih angin an tan mar pat a ngai a. Kawng engkima sawrkar hnathawk dang te entawn tur leh an nau te entawn tlaka nung tur leh an nundan in uluk tur an nih thu te a sawi a. Police officer te chu team leader an nih angin hruaitu tha nih tuma, an nau te thawhpui thiam tur leh an naute duhsak theihnghilh lo turin a chah bawk a ni.

Fuihna thusawitu dang Chief Secretary Pu Lalnunmawia Chuaungo chuan Sawrkar hmelhmang hmuh awlsam ber chu Uniform ha Policemen te an nih tih a sawi a. State pawn lam atanga Mizoram hmelhmang an hmuh hmasak ber pawh Traffic Police te leh Police duty te an ni a ni. Chief Secretary chuan Mizoram ramin hun harsa a tawh laiin Police te hnathawh a fakawm tih a sawi a. Aizawl khawpui tawt tak,a phu tawk aia lirthei veivah tamna pawh huphurh lawk ang lo takin tun thleng chuan Traffic Police te inpekna leh an hotute remhriatna avangin a ziaawm a, a lawmawm hle a ni a ti. Disciplined Service an nih angin Police te tan chuan thuawih, rinawm, hriselna vawn that leh mahni inthununna nei that a pawimawh em em a. Police te chu englai pawhin Sawrkar hnathawk te entawn tlak nih tum turin a chah bawk a ni.

Police hna leh inkaihhruaina chungchangah Pu John Neihlaia, IGQ(HQ) & Acting DGP chuan Police Officer te tan bika hriattur thu pawimawh tak tak te, tanlak ngai lai te a sawi a. Dan leh Hrai hriatna kawngah tanlak a ngaih thar tur te sawiin State dang police emaw IPS te tih theih ang tih theih duh tawka lova a thiam ber nih tum turin MPSA member te chu a fuih bawk a ni.

12th MPSA General Conference, 2021 chu Pu Zosangliana, Sr VP, MPSA chuan a kaihruai a. He hunah hian MPSA member chatuan chatuan ram pan ta te puala sunna hunt e hman a ni a; hemi hnu hian MPSA member thar te lawmluh an ni bawk a ni. Pawl hmalakna chungchangah report Pu David H.Lalthangliana, GS, MPSA in a pe a; sumvawngtu report Pu Lalmalsawma Hnamte, FS, MPSA hnen atangin ngaihthlak a ni leh a. Official programme bik chu Pu C.Lalnunmawia, VP, MPSA chuan lawmthu sawiin a kar a. Hemi hnu hian session dang te MPSA inrelbawlna chungchangah neih niin hruaitu thar inthlanna neih a ni nghal a ni.