Vawiin khan Hawla Auditorium-ah Mizoram State Rural Livelihoods Mission(MzSRLM) huaihawtin sawrkar laipui hmalakna programme - Gram Swaraj Abhyan(Thingtlangmite tana hmasawnna lamtluanga inrelbawldan tha zawk zirtirna beihpui) hnuaiah Aajeevika Evam Kaushal Vikas Mela - Eizawnna leh thiam thil  inkawhhmuhna Kutpui chu hman a ni. He hunah hian Rural Development Minister Pu R.Lalzirliana chu khuallian a ni a.  Thingtlang khaw hrang hrang atangin  Self Help Group(SHG) te lo kalin he hun hi an rawn chhim a ni. 

Aajeevika Mela programme-ah hian Rural Development Minister Pu R. Lalzirliana chuan ramin  hma a sawn  theihna turin thingtlanga chengte hma an sawn hmasak phawt a pawimawh tih a sawi a. SHG chu retheihna umbo tura a bul tanna  leh hmasawnna lamtluanga rahbi hmasaber  te zinga mi a ni a ti. SHG te hlawhtlinna te chu a sum zawnga tehin lian tham rih lo mahse hmasawnna lian zawk leh sum tam zawk thawkchhuak tura thingtlangmite buatsaihtu a nih avangin a pawimawh em em tih a sawi a. "SHG hi mitin tan a ni a. Mahni a bul tanna sum nei daih lo, intodelh tura hmasawn duh tawh phawt chuan thurualpui zawngin pawl anga intelkhawma hmalak nan SHG hi thil tih chi tak a ni a. Tunah hi chuan SHG tam ber  hi chu hmeichhe intelkhawmte siam a ni deuh vek a. Mipa te paw'n he hmalakna huanga luh nachang hi hria se tun aiin sawkar laipui hnuaia hmasawnna programme hrang hrangte kan  state sawrkar pawhin  phur taka a kalpui mek te pawh hian awmzia a nei thui zawk dawn a ni", a ti. 

Aajeevika Evam Kaushal Vikas Mela programme hi Rural Development  Commissioner & Secretary Pu Lalhmingthanga'n a kaihruaia. He hunah hian mithiam sawmbikte te hnen atangin thupui 3 - Women Empowerment, Entrepreneurship & Livelihoods leh Women entitlements under Social Welfare Department-ah inzirtirna hun hman a ni. He hunah hian MzSRLM hnuaia RSETI leh PMKVY hlawhtlinpuitute thukhawchang ngaihthlak niin SBI - Rural Self Employment Training Institute(RSETI) atanga zirchhuakte hnena Certificate hlanna hun pawh neih a ni a. MzSRLM in sawrkar laipui hmalakna a kalpuina hrang hrang atana  tanpuina sum, loan pechhuak thazual - an pek chhuah tam dan indawtin, Mizoram Rural Bank(MRB) Kawrthah, MRB Vairengte, MRB Lungdai, MRB Kolasib leh MRB West Phaileng te hnenah RD Minister Pu R.Lalzirliana hnathawk tha lawmman hlanna a nei bawk a ni. 

Aajeevika Evam Kaushal Vikas Mela programme pual hian MzSRLM  Official te chuan  programme chhimtute leh a mamawh apiangte  hman tangkai tur,  SBI- RSETI leh Deen Dayal Upadhyaya Grameen Kaushalya Yojana(DDU-GKY) chungchang inziahna an lehkha an sem a. DDU-GKY hi thingtlang thalaite -  kum 15 leh 35 inkar hnazawng mek te mamawh thiamthil  a thlawn a zirtirna a ni a. DDU-GKY hnuaiah hian Health Care bikah General Duty Assistant leh Pharmacy Assistant, IT & ITES hnuaiah Domestic data Entry Operator bakah Trade dang - Puathui, Lirthei khalh, Electronics & Hardware, Tourism & Hospitality leh a dangte a thlawna zir theih a ni. Hrechiang duh tan  MzSRLM Office, RD Office hnuai, Chanmariah zawh theih a ni a. RSETI pawh State Bank Of India(SBI) hmalakna in Zemabawkah, MDTC-KVIB Campus-ah kalpui mek a ni a. Piggery EDP, Poultry EDP, Bee -Keeping, Mushroom Production, Tailoring, Bamboo & Cane Craft, Papad,pickle & Masala Powder Making, Beauty Culture, Computer Basics, Entrepreneurship in Computer DTP, Fast Food Stall Udyami, EDP for micro - entrepreneurs, General EDP leh PMEGP te zirtirna SBI-RSETI-ah hian neih mek a ni.