4867/2024-2025

Farkawn, 28th March 2025: Tuipuiral Group YMA te chuan nizan khan Farkawn Joint YMA Hall-ah Conference vawi 46-na an hmang a. He hunah hian Rural Development Minister Prof. Lalnilawma chu khuallian niin, Er. H. Duhkima, Engineer-In-Chief, PHED chuan khual zahawm niin a telpui bawk a ni.

Khuallian Prof Lalnilawma chuan Tuipuiral Group YMA Conference chhimtute chibai bukin, YMA thil tum pathum te chik zawk a ngaihtuah a, tihlawhtlingtu ni ṭheuh turin a sawm a. YMA thil tum pathum te hi zofate hmasawnnna ngaihtuahna kawng anih thu sawiin, kalkhawmte chu an hun awl ṭha taka hmang tur te, zofate hmasawnna tura thawh hreh nei lo tur leh Kristian nun dan ṭha ngaisanga zawmtu ni ṭheuh turin a chah a ni.

Prof Lalnilawma chuan Mizoram chu ‘Zotlang ram nuam’ tia chawi anihna pu zo turin ṭan lak a ngai hle a ni, a ti a. Mizo mipa suat mek tu ruihhlo laka fihlim te, tuihna humbalh te, zirna lama ṭan lak leh mahni intodelh tumna te chu YMA Kumpuan thupui - ‘Ram leh hnam humhalh’ nen pawh a inhmeh hle a ni, a ti bawk a. Kalkhawmte chu an awmna hmun apiangah mizo palai an ni tih in hre thar a, zo nun ze mawi chawinung zel turin a chah bawk a ni.

Rural Development Minister chuan sawrkar ruahmanna thar angin a department chan Rural Development leh Local Administration Department te an inchhunfin tur thu a tarlang a. Rural Development & Administration Department kaltlang hian khawtlang hmasawnna thlen a duh thu sawiin, “Khawtlang hruaitu, tlawmngai pawl, leh farmer society-te chu ram intodelhna kawngah hian thawhpuiah ka sawm che u a ni,” a ti.

Khual zahawm Er. H. Duhkima, Engineer-In-Chief pawhin he hunah hian hmasawnna atan khawtlang inrualna a pawimawh thu a sawi a. Nungcha, ramngaw leh tuihna chereu mek zel venghim tur leh zo nun ze mawi chawi nung zel turin kalkhawmte a ngen a ni.

He hun hi Pu Lallawmawma, Vice President, Tuipuiral Group YMA chuan a kaihruai a. Tuipuiral Group YMA Conference vawi 46-na hian March ni 28 thleng a awh ang.