4868/2024-2025

Aizawl, the 28th March 2025: Vawiin chawhma khan Aizawl SP Conference Hall-ah Aizawl District Superintendent of Police Pu Rex Zarzoliana Vanchhawng chuan Aizawl khawpuia Seal siamtute a ko khawm a. Seal Siam chungchang, a kaihhnawih dan zawm tur leh fimkhur ngai lai te a sawipui.

Aizawl SP chuan vawiin khan Seal Siam Chungchangah Mipui leh Seal siamtute zawm tur hriattirna pawimawh pawh a hnuaia tarlan ang hian a chhuah nghal bawk a ni.

SEAL SIAMTUTE NGENNA LEH HRIATTIRNA

Documents (lehkha) lem siam nan leh inbumna atan a Seal lem siam hi dan bawhchhiatna lian tak a ni a. Heng documents lem siamna atana hman tura seal lem siam emaw chutiang seal lem dik lo taka hman tumna rilru nei chunga kawl te hi dan hmanga thubuai siamsak a hrem theih a ni. Section 341 BNS (Bharatiya Nyaya Sanhita, 2023) hnuaiah heng dan bawhchhiatna a inhnamhnawihte chu dam chhung lungin tan thlenga hrem theih an ni.

Seal lem hmansual leh seal lem hmanga inbumna leh a kaihhnawiha dan bawhchhiatna kan pumpelh theih nan a hnuaia tarlante hi Seal siamtute’n an zawm ngei tur a ni:

1. Seal siam tur emaw siamtir turte chu seal siamtute’n an nihna (identity) tichiang thei tur finfiahna an dil tur a ni. Identity proof mai bakah biakpawhna tur phone number dilin record mumal tak an siam tur a ni.

2. Seal siam chhan a dik/rintlak em tih an finfiah ngei tur a ni a. Sawrkar Department leh Office a hman tur a nih chuan chu Office a thuneitu (competent authority) hnen atanga seal siam phalna lehkha an keng tel ngei tur a ni. Tin, Sawrkar agency hrang hrang leh NGO te pawhin seal siam phalna pe theitu in phalna lehkha a pek hmang chauhin Seal an siam/siamtir tur a ni. Phalna lehkha lem hmanga Seal lem siam tum an awm theih avangin uluk taka finfiah hmasak zel tur a ni.

3. Seal siamtute’n an seal siam tur te a dik/rintlak ngei a ni tih an finfiah hnu ah chauh seal an siam tur a ni.

4. Seal siam tum te zingah sawrkar department leh office leh pawl, etc. rinhlelhawm deuh an awm a nih chuan chu department/office emaw pawl, etc. chu a awm ngei em tih an finfiah hnu ah chauh seal siamsak tur a ni.

5. Seal lem kan siamsak palh emaw kan seal lem siam miin dan bawhchhiat nan an hmangsual a nih chuan a mawh kan phur tel ve a ni tih hre chungin fimkhur thei ang berin seal kan siam hram hram tur a ni.

6. Dan lova Seal lem siam tum emaw siam emaw kan hria a nih chuan Police Station hnai berah hriattir tur a ni.