3497/2024-2025

2024 Pawltlak thla ni 12: Lunglei District-a Bunghmun khua chuan December ni 11 & 12, 2024 khan "Inpumkhatna" tih thupui hmangin an khaw kum 125 tlin (quasquicentennial) lawmna leh 'Bungkhawpui Haw Runpui' hun an buatsaih a. Mizoram sawrkara Rural Development Minister Prof. Lalnilawma chuan Khuallian niin a hmanpui.

Vawiina Bunghmun kum 125-na lawmna, 'Lalhmingliana Run', Bunghmun Tennis Court, Mini Sports Complex-a buatsaihah Khuallian Prof. Lalnilawma chuan Bunghmun mipuite quasquicentennial chibai bukin, lawmpuina leh duhsakna a hlan a. Bunghmunin tun dinhmun a thlen theih nana sul sutu hmasate zahna chibai bukin, kum 125 tlin lawmna atana organising committee te hma lakna fakawm a tih thu a sawi a. Bunghmun khua leh Bunghmun tlang dung hmasawnna atan hmabak tam tak la awma a hriat thu sawiin, chumi atan chuan sawrkarin hmachhawp a neih nual thu leh theih tawp chhuah zel tum a nih thu a sawi a. Bunghmun mipuite chu tun dinhmuna lungawi mai lo va, thlen chin aṭanga hmasawn zel tum tura chahin, mipui hawiherin hmasawnna hmelhmang a hril thui hle tih sawiin, khaw hmasawn nan khaw mipuite'n sawrkar nen thawh hona ṭha an neih a pawimawh thu a sawi a. Khua leh mipuiin hma an sawnna tura sawrkara dilna lutah mipui intodelhna tur lian ber se, ni 100 inhlawhna kal tlanga hna thawh pawh kan ei zawnna nen inkungkaih ni zel se tih chu a duh dan a nih thu sawiin, inhlawhna rilru pua hna chhe te te beisei lo va, khawtlang mamawh tak tak atan inlungrual taka rilru seng tlang turin Bunghmun mipuite chu a chah a ni.

Khuallian Prof. Lalnilawma chuan khawtlang hmasawn nan sawrkar hna bakah, mahni kea ding thei tura ei zawnna dang dap leh ei leh bara intodelh tura ṭan lak a pawimawh thu sawiin, hmasawnna atan zirna uar sauh sauh tur te, ruihhlo laka fihlim a, ṭhalaite'n harh fima khawtlang hruai tura puan ven sawi chhing tur te'n a chah a. Tuihna kiam zel chu veiawm a tih thu sawiin, Bunghmun rama tuihna awm ang angte veng him zel turin mipuite a chah a. CM Rubber Mission hnuaiah project lian tak kalpui tum a nih thu sawiin, Bunghmun mipuite chu ei zawnna atana ṭha ngaihtuah tur te, rubber pawh hlawhtlinpui thei tura ngaihven tur leh ram ṭha tak an neih, Chal lui kam leilet cheibawl tura ruahmanna siam tur te'n a chah a. Bunghmuna office hrang hrang tichangtlung zel tura hma lak tum a nih tur thu sawiin, RD department hnuaia quarters cheina tur 4 ruahmanna zinga 1 chu Bunghmun block-a dah tur leh khawtlangin tui zem lian an mamawh belh chu dah belh turin homework-ah a neih tur thu a sawi a. Khawtlang hmasawnna tur ruahmanna ṭha a awm chuan sawrkar chu a tlanchhe dawn lo, tih a sawi.

Bunghmun kum 125-na lawmna pual hian December ni 11, 2024 (Nilaini) zan, December ni 12, 2024 (Ningani) chawhma leh zan lamah te vantlang inkhawm buatsaih a ni a. Khuallian bakah hian Thorang bialtu MLA Er R. Rohmingliana, Ex-MLA Pu Zodintluanga leh Bunghmun khaw chhuak Ex-MLA Pu B. Lalchungnunga te'n hun hmanpuiin, thu an sawi a. Khual thlengtu, Bunghmun kum 125-na Organising Committee Member Pu C. Lalnunnema'n inlawmna thu sawiin, Bunghmun BDO Dr Lalramdintluanga leh Bunghmun khaw dintu lal, Lalhmingliana thlah, Pu Lalsanglura Sailo te pawhin thu an sawi a. Media & Publicity Committee buatsaih Bunghmun khaw documentary thlir ho niin, Organising Committee Secretary leh Bunghmun RD Block aṭangin report ngaihthlak a ni a. Tun hma aṭanga Bunghmun khaw tihmingṭhatute chawimawina hun buatsaih niin, BCM Bunghmun Pastor Bial Zaipawl, Pu Vanlalsailova, Nl. Feli Hauhnar, Nl. Jenny Zathang leh tualchhung zaithiamte'n zaiin mipui an awi a. December ni 12, 2024 (Ningani) chawhnu lamah cultural programme hlimawm tak hman niin, tlaiah ran lu kima kum 125 tlin lawmna ruaipui buatsaih chu kil ho a ni bawk.

Bunghmun khua hi Haulawng lal Thangvunga Sailo fapa Lalhmingliana'n South Lushai Hills Bawrhsap (Superintendent) Tarmita (Capt. J. Shakespear) phalnaa a din niin, kum 1899 aṭang khan mei mit lovin khua hi luah chhunzawm zel a ni a. Tun dinhmunah Bunghmun khuaah hian in 230 vel awmin, mihring 1,250 vel an cheng mek a. Rural Development Block ṭhut hmun niin, kum 1974 khan RD Block hi bul ṭan a ni a. Sawrkar office pawimawh tak tak awm bawkin, Lunglei District hmarthlang lama khaw pawimawh tak a ni.