3498/2024-2025

2024 Pawltlak thla ni 12: Mizoram sawrkara Rural Development Minister Prof. Lalnilawma chuan vawiin chhun khan Bunghmun RD Block kum 50-na, Golden Jubilee lungphun chu Bunghmun BDO Office Complex-ah a hawng.

Bunghmun BDO office-a RD Block kum 50-na puala inkhawm tawi buatsaihah Minister Prof. Lalnilawma chuan Bunghmun RD Block-in kum 50 a tling ta chu lawmawm a tih thu sawiin, block office bul ṭannaa sul sutute leh tun thlenga BDO leh staff-te inpekna fakawm a tih thu a sawi a. Bunghmun block hmasawn nan BDO office leh thawktute an pawimawh tih sawiin, thawktute chu anmahni dawrtu mipuite ṭha taka dawngsawng ṭhin tur te, an puih theihna apiangah pui a, an puih theih lohnaah pawh ṭha taka thil hrilhfiah ṭhin tur te'n a chah a. BDO office chu block hmasawn nana sawrkar ruahmanna hrang hrang a taka kalpuitu an nih angin, thawh hona ṭha tak nen ṭhahnem ngai taka thawk turin a chah a. Attendance ngai pawimawh a, office kai hun bi ngai pawimawh tur leh office hun chhungin mipuite dawr theih tura ṭha taka awm turin a chah a. RD kal tlanga hna thawhah hna ṭha a awm tur a ni tiin, hna ṭha a awm theih nan leh Bunghmun block hmasawn nan BDO office-a thawkte leh khawtlang mipuite chu thawh hona ṭha tak vawng nung reng turin a chah a ni.

He hun hi Bunghmun Block Development Officer (BDO) Dr Lalramdintluanga chuan a kaihruai a. RD Block report ngaihthlak a nih bakah, khual pawimawhte hnenah RD Block golden jubilee hriat rengna thilpek hlan niin, Bunghmun kum 125-na Khual Thlengtu Pu C. Lalnunnema'n thu a sawi bawk a. RD Block golden jubilee lawmna thingpui in ho a ni bawk.

Bunghmun khua hi Community Development Block hmun atan kum 1973 aṭangin sawrkarin ruahmanna a nei ṭan a. January ni 7, 1974 khan Lunglei BDO Pi Zodinpuii'n Community Development Block hi a hawng a. A din tirh aṭangin tun thlengin Bunghmun RD Block hian BDO 29 nei tawhin, BDO hmasa ber chu Pu Vanengmawia niin, tunah hian Dr Lalramdintluanga a awm mek a. Tunah hian thawktu Establishment staff 6, MGNREGS staff 19 leh MzSRLM staff 10 awmin, a pum puiah thawktu 35 an awm mek a ni.

Bunghmun khua hi District Headquarters Lunglei hmarthlang lamah awmin, Lunglei aṭanga km 145 vela hlaa awm a ni a. Mihring 1,250, mipa 630 leh hmeichhia 620 vel khawsa mekin, in ding lai 230 vel a awm a. Bunghmun RD Block huam chhungah hian tun dinhmunah khaw 20 leh sub-village 2, a vaiin khaw 22 a awm mek a ni.