2372/2024-2025

Champhai, 4th October 2024: Vawiin chawhma dar 11:00 khan Rural Development Minister Prof. Lalnilawma chuan Mizoram State Rural Livelihood Missions (MzSRLM) buatsaih Sales of Rural Artisans Society Fair (SARAS) Fair 2024 chu Hnahsin Kut neihna hmun Aui Garden, Champhai Phai pheiah a hawng.

SARAS Fair hi MzSRLM bultumin kum 2015 atang khan neih ṭan a ni a. Kum tin State Capital leh District Headquarters a neih ṭhin tura ruahman  a ni a, Covid hripui leng leh inthlanpui ten a khaihlak ṭum tih lohah chuan tluang taka neih ṭhin a ni. SARAS Fair 2024 hi SARAS Fair vawi kua neihna a ni a, October ni 4 aṭanga ni 11 chhung neih tur a ni. He hunah hian Mizoram hmun hrang hranga Self Help Group ten Stall 44 ah an thil siam te an pho chhuak a ni.

MzSRLM hi National Rural Livelihood  Missions hnuaiah kum 2013 khan din a ni a. A tum ber chu thingtlanga cheng chhungkaw harsa zawk te Self Help Group (SHG) hmanga khaichhuah leh retheihna an kalsan hma ṭanpui a ni. MzSRLM hian Mizoram District 11 leh RD Block 28 te a tuamchhuak vek tawh a, SHG hnuaiah hian chhungkaw  81,829 an inziaklut tawh a,  SHG-te khaikhawm tur hian Village Organisation 791 leh Cluster Level Federation 84 din a ni tawh bawk. Mizoram puma SHG-te tan hian Community Fund cheng nuai 18449.99 pek chhuah tawh a ni a; SHG 5149 ten Bank Loan la tawhin, an loan lak tawh zawng zawng belhkhawm hi cheng nuai 15163.9 a tling tawh a ni. 

He hunah hian khuallian RD Minister Prof. Lalnilawma chuan Hnahsin Kut Organising Committee te chibai bukin, Hnahsin Kut ruala SARAS Fair 2024 buatsaih a ni thei chu lawmawm a tih thu a sawi a. SARAS Fair thil tum ber chu Self Help Group-te thil tharchhuah, hralh chhuah leh mipui hmaa pholanna remchan zawn a ni, a ti. RD Minister chuan Aizawl khawpuiah chauh ni lo, Mizoram hmun dangah pawh hmasawnna leh thil thar thlen zel a duh thu sawiin, Champhaia SARAS Fair neih anih theihna tura hma la tu sawrkar official te chungah lawmthu a sawi a ni.

Rural Development Minister chuan SARAS Fair a phochhuah SHG-te thilsiam chu mipui hip thei tur berin a tuamna (packaging) leh a hming pek (labelling) pawh duan a ni, a ti a. Ei leh in kaihhnawih vawiina phochhuah te phei chu Food Safety and Standards Authority of India (FSSAI) registration nei vek an nih thu a sawi bawk. Prof. Lalnilawma chuan mipuite chu ramdang thilsiam aia SHG te thilsiam hlut sak a, hnam rilru pu chunga dawr zel turin a ngen a. Hmasawn ngaihna laiah mipuite thurawn dawng turin a enkawl Department chu an inpeih reng tih a sawi bawk a ni.

Adviser to CM (Technical), Champhai North bialtu MLA ni bawk Er H. Ginzalala chuan Champhai khawpuiah SARAS Fair neih a ni thei chu lawmawm a tih thu a sawi a, Mizoram tan hmasawnna mel lung pawimawh tak ni thei se a duh thu a sawi. Tlang ram lo neih chuan mipuite mamawh a phuhruk zo meuh tawh lo a, hei vang hian ngaihtuahna thar senga kalphung thlak a ṭul tawh tih a sawi a ni. Mizoram sawrkarin mitin ten eizawnna ngelnghet zawk an neih theih nan hma a la mek zel a ni, a ti a. Ṭhalaite chu sawrkar kutah chauh innghat lova, eizawnna hlawm hrang hrang (primary, secondary leh tertiary sector) te ṭhui khawmtu nih tum ṭheuh turin Er. H. Ginzalala hian a chah a ni.

Champhai South bialtu MLA Lt. Col. Clement Lalhmingthanga pawhin thu sawiin mi zawng zawng tan sawrkar hna hmuh vek theih a nih loh avangin mipuite thiamna tihpun leh an kutkawihte tihhmasawn a ṭul a ni, a ti a. Mizoram sawrkar chuan MzSRLM hnuaiah DDU-GKY scheme kaltlangin a thlawn veka ṭhalaite thiamna tihpun (skill development) leh hna zawn sak a kalpui mek tih a sawi a. SARAS Fair leh DDU-GKY ṭhatna te chu Mizoram khaw tin ten chhawr thei se a duh thu a sawi bawk. Champhai South bialtu MLA chuan ram changkang tehna chu mi hausa tam lam aiin, mi rethei tlem lam a ni zawk tih pawh sawiin pheikhai rual taka chhungkaw tin ten hma an sawn chu Mizoram sawrkar hmathlir pawimawh tak a ni, a ti.

He hunah hian Pi Sheryl L. Vanchhawng, Chairman, Mizoram Rural Bank pawhin  Regional Rural Bank te leh Livelihood Mission te thawhho dan tlangpui a sawi a. Pu Lalnunhlua, Addl Secretary, RD Department chuan MzSRLM leh SARAS Fair chungchang report a pe a. Pi Zosangzuali Pachuau, Chief Executive Officer, MzSRLM in lawmthu sawina neiin hun a khar a ni.