3616/2024-2025
Khawbung, 2nd December 2024: Vawiin khan Rural Development Minister Prof. Lalnilawma chuan Khawbung RD Block-in ‘Project Rotling - Hmasawnna Rahbi Thar’ hnuaia an hnathawh - ‘Project Sustainable Livelihood through Ericulture at Chhingzawl Ram’ chu a tlawh a. Minister hian Tuipuiral Games 2025 neihna tur Samthang Playground laih zauh dan tur pawh a hmun ngeiah a en nghal a ni.
‘Project Sustainable Livelihood through Ericulture at Chhingzawl Ram’ ah hian Rural Development leh Sericulture Department-te thawhdunna (convergence) a ni a. He project hnuaiah hian Chawngfianga tui, Mu bu ram ami chu lak a ni a. Tui dahkhawlna atan hian tuizem lian pakhat siam niin, a thlang lamah ruah tui khawlna tur leh tuizem lian aṭanga tui sem thlakna tur tuizem (medium size) panga siam a ni. Tui hi Chhingzawl rama muṭih, pangbal leh thlai dang te chawm nan a hman tur a ni a, heng thlai te hi Eri pangang (Eri Silkworm) chaw a hman tur a ni.
‘Project Rotling – Hmasawnna Rahbi Thar’ hi Mizoram chhunga RD Block 28 te inelna a ni a, he project hnuaiah hian Short Term Project (kum 1 chhunga thawh zawh tur), Medium Term Project (kum 2/3 chhunga thawh zawh tur) leh Long Term Project (kum 5 chhunga thawh zawh tur) a ni a, RD Block 28 atangin concept paper 84 a lut a, hengte hi District tinah a bialtu Project Director ten an endik hnuah State-Level Expert Panel in project 27 an thlang chhuak a, heta tang hian RD Minister kaihhruai State-Level Monitoring Committee in project 15 ah an lo thlifim leh a ni.
He project hnuaiah hian Short Term Project turin Khawbung RD Block hnuaiah ‘Project Sustainable Livelihood through Ericulture at Chhingzawl Ram’ leh Medium Term Project turin ‘Preparation of Productive Vegetable Farm at Buhtang Zawl and Khiangpui Zawl, Bungzung’ te thlan chhuah an ni.
RD Minister hi Khawbungah zan a riak ang a. Naktuk hian Khawbung RD Block Silver Jubilee lawmna chu khuallian niin a hman pui ang a, he mi hnu hian Aizawl a pan ang.
