622/2023-2024

2023 Ṭomir thla ni 30: Bungtlang 'S'-a Block Development Office-cum-Panchayat Bhavan building sak thar leh Rural Development Department Rest House thar chu vawiin khan Rural Development (RD) Minister Pu Lalruatkima chuan a hawng.

Minister Pu Lalruatkima chuan BDO office building thar leh RD Department Rest House banga chhinchhiahna lungphek phum zar hliahna puanzar pawt hawng a, kawngkharpuia ribbon zam a cheh chah hnuah kawngkapui hawngin, building chhung lam a fang kual nghal a. Hemi hnu hian Bungtlang 'S' BDO office building thara Conference Hall-ah building thar lawmna inkhawm buatsaih zui a ni.

Minister Pu Lalruatkima chuan Bungtlang 'S'-a BDO office-cum-Block Panchayat Bhavan building sak thar ṭha tak leh khualzinte thlen theihna tur RD Department Rest House ṭha tak hawn theih a ni ta chu lawmawm a tih thu a sawi a. Uluk taka enkawl zui tur leh ṭangkai taka hmang turin thawktute leh khawtlang mipuite chu duhsakna a hlanin, a chah a ni. BDO office chu mipuiin an harsatna an thlen a, sut kiansak an nihna hmun tur a nih thu sawiin, thingtlang khaw hrang hrang aṭanga rawn pantute hawihhawm taka lo dawnsawn a, lo ṭanpui chu thawktute mawhphurhna a ni, a ti a. RD Department hnuaia scheme hrang hranga sum lo kalte chu ṭangkai taka hmang tur leh thawh rimna leh taimakna nena hlawhtlinpui tum turin hamṭhatna dawngtu beneficiary-te a chah a ni.

Minister chuan RD Minister a nih hnuah kum 4 chhungin MGNREGS-ah ni 100 inhlawhna an siam zat zat thei tih sawiin, kumin kum tharah pawh ni 100 inhlawhna siam leh turin ruahmanna siam a nih thu a sawi a, kum 5 chhungin "Ni 100 inhlawhna" tih hming putu MGNREGS chu a hming ang ngeia dik taka kalpui theih a ni tur chu lawmawm a tih thu a sawi. Kum 2018-a sawrkar thar a pian hnuah Mizoram chuan hripui, khuarel chhiatna, ramri buaina leh harsatna hrang hrangah hun khirh tak a hmachhawn tih sawiin, chu'ngte chu Pathian hruainaa pal tlang a ni zel a, hun khirh laia Mizoram enkawl turin sawrkar lai chu Pathianin a ruat nia a hriat thu a sawi a. Myanmar, Bangladesh leh Manipur-a Zo hnahthlak harsatna tawkte kan ṭanpui dan leh kan lo mikhual dan chu hnam inpumkhatna lantirtu a nih thu sawiin, kan ṭawngṭaina avangin kan unau harsatna tawkte'n chakna an nei, a ti a. Sawrkarin ram hmasawnna tur leh mipuite hamṭhatna tur ruahmanna hrang hrang a siam ṭhinte ṭha taka thlawp zel turin mipuite chu a chah a ni.

Building thar hawnna hun hi Mizoram Sawrkara RD Department Additional Secretary Pi Irene Zohlimpuii Chongthu chuan kaihruaiin, kal khawmte lawmna thu a sawi bakah, RD Minister Pu Lalruatkima kaihhruaina hnuaiah RD Department-in nasa takin hma a sawn a, infrastructure lamah pawh hmasawnna nasa tak hmuh tur a awm tih a sawi a. Presbyterian Church of India pastor Rev. R. Lalruata'n hunserh hmangin, RD Department Joint Secretary Pi Ethel Rothangpuii hnen aṭangin BDO office-cum-Panchayat Bhavan building sak thar technical report ngaihthlak a ni a. Bungtlang 'S' BDO Pu Hmingmawizuala hnen aṭangin RD Rest House thar technical report ngaihthlak a ni bawk a. Lawngtlai DRDO Project Director Pi Marilyn Rualzakhumthangi'n lawm thu sawiin hun a khar a ni.

Vawiina Bungtlang 'S' BDO office building leh RD Department Rest House hawnnaah hian LADC-a  elected member-te bakah, RD Department aṭangin Additional Secretary Pi Irene Zohlimpuii Chongthu, Joint Secretary Pi Ethel Rothangpuii, MzSRLM Chief Executive Officer Pi H. Lalchhandami, Lawngtlai DRDO Project Director Pi Marilyn Rualzakhumthangi, Deputy Secretary Pu Zoremthara Ralte leh official dangte, MNF party hruaitute, DRDO leh BDO official leh staff-te, village council ai awhte, self help group member-te, tlawmngai pawl hruaitute leh khawtlang mipuite an kal khawm a ni.

Bungtlang 'S' BDO office building hi MGNREGS leh MzSRLM convergence aṭanga ₹ nuai 172.94 senga sak a ni a. July 11, 2022 khan hna ṭan niin, April 20, 2023 khan thawh zawh a ni. A building hi a dung feet 61 leh a vang feet 31-a zau niin, chhawng li a ni a; canteen, chowkidar quarters, officer leh staff office room bakah, a chhawng chung berah square metre 203-a zau Conference Hall te a awm a ni.

RD Department Rest House hi MGNREGS material component aṭangin ₹ nuai 8 sengin building ruhrel awm sa chei ṭhat a ni a. A dung feet 52 leh a vang feet 36-a zau niin, pindan panga - VIP Room 1, Semi-VIP Room 1 leh Ordinary Room 3 a awm a. Ordinary Room-ah hian khum 3 ṭheuh dah niin, a zavaiin khum 11 a awm a. Official-te leh VC-te leh khualzin a mamawh apiang tan thlen theih tura ruahman a ni.