621/2023-2024

Aizawl, the 30th May 2023: Governor Dr Hari Babu Kambhampati chuan vawiin khan Tualchhung Chanchinbu chhuahtu thenkhat te a kawm a. Mizoram tana thil pawimawh nia a hriat te a titi puiin Media lam ngaihdan leh an ngaih pawimawh te pawh a zawt bawk a. Hemi hnu hian Governor chuan a inleng te hi chawchhun a kil pui a ni.

Governor Dr Hari Babu Kambhampati chuan Print Media Publisher te kawmnaah hian a hna pawimawh ber chu, Mizoram Sawrkar leh Central Sawrkar inkar ah thawk palai, Central a nawr tul apiang te nawr a, state mamawh state official ten an thehluh te umzui bakah a tul anga State tana theihtawp chhuah a ni a ti a. Mizoramah hmasawnna atan Media ten hna pawimawh tak an thawk nia a hriat thu sawiin theih tawp chhuah chhunzawm turin a chah hmasa a ni.

Governor leh Media Publisher te inkawmnaah hian thupui neih lawk bik a awm lo a. Mizoram hmasawnna atana pawimawh leh tih tul deuh nia hriat te sawiho a ni a. Hengah te hian Media in engtin nge hma a lak ang tih te sawiho a ni bawk.

He inkawmnaah hian Kawlphetha siamchhuah, Kawngpui, Skill Development, Bank leh loan kaihhnawih, central welfare leh security scheme mipui nawlpuiin an hmelhriat theih dan tur te, leh thil pawimawh dang te sawiho a ni.

Governor nena inkawmnaah hian Print Media Publisher te lam atangin Pu K. Sapdanga, Editor, Vanglaini, Pu C. Lalrambuatsaiha, Editor, The Aizawl Post, Pu Vanlalrema Vantawl, Editor, Zalen, Pu Adam Halliday, Editor, The Frontier Despatch, Pu Zabiaka, Editor, Newslink, leh Pu M. K. Dey, The Mizoram Post te an tel a ni.