620/2023-2024

Aizawl, 30th May 2023: Aizawl Common Service Center Society chuan an Annual General Body Meeting chu vawiin khan Taxation Department Auditorium, MINECO-ah an hmang a. Information & Communication Technology changtu Minister Pu Robert Romawia Royte chuan khuallian niin a hmanpui.

Pu Robert Romawia Royte chuan Aizawl Common Service Center Society ten hun pawimawh tak hmanpui tur a an sawm chu lawmawm a tih thu a sawi a; hun lo kal zel turah pawh tha taka sawrkar thawhpui zel turin a ngen nghal a ni. Common Service Center (CSC) ten mipui rawngbawlna hna hun rei tak an lo thawh tawhna ah lawmthu Minister chuan a sawi a, zau zawka vantlangin an hnathawh an hriat theih nan tan la turin a fuih nghal bawk.

Information & Communication Technology (ICT) Department hmalakna hrang hrang tarlangin Pu Robert Romawia Royte chuan Mizoram Budget atangin ICT Department-in cheng nuai 507.38 chauh nei mah se, thawktute hmalakna zarah Mizoram Budget pawn atangin hmasawnna hnathawhna tur cheng nuai 9200 zet an nei tih a sawi a. Mizoram sawrkar department-te chu state budget-ah chauh innghat lova, Union Budget-a hmasawnna sum awm te haichhuah kawngah tan lak thar a tul a ni, a ti. PMJVK scheme hnuaiah IT Development Training Center din nan cheng nuai 690 sanction a nih tawh thu te, Village Knowledge Center 15 din nan NABARD hnuaiah cheng nuai 427.35 hmuh a nih thu leh VSAT hmanga tuam thar khaw 500-ah free wifi connection pek tum a nih thu te Minister hian a tarlang a. Changtlung zawka internet leh mobile connectivity pekchhuah a nih theih nan khaw 79 te chu OPGW-Optical Fibre Network hmanga thlunzawm an nih tur thu sawiin, he mi atan hian cheng nuai 5000 SASCI Part V hnuaiah hmuh a nih tawh thu leh State Data Center tihchangtlun nan SASCI Part IV atangin cheng nuai 2250 hmuh a nih tawh thu a tarlang bawk.

Vawiin program hi Aizawl CSC Society Chairman Pu Lalruatkima chuan a kaihruai a, Pu R. Lalhruaitluanga, General Secretary chuan report pein; Pu Lalduhkima, CSC State Head pawhin thu sawina hun a hmang bawk.

Tun dinhmunah Mizoramah CSC 940 a awm mek a. Sawrkar kum liamta chhung khan transaction 116000 neiin, cheng vaibelchhe 26 an thawkchhuak a; sawrkar department leh bank hrang hrang te nen inthlunzawmin mipui tan rawngbawlna (service) hna pawimawh tak an thawk mek a ni.