619/2023-2024

Kolasib dated 30th May 2023: Vawiin chawhma khan DRDO Conference Hall, Kolasibah ‘Green Mizoram Day 2023’ hman dan tur relin District Level Committee-te chuan thutkhawmna an nei a. Pu John LT Sanga, Deputy Commissioner chuan hun kaihruaiin Pi Margaret Lalramchhani, DFO chuan Green Mizoram day 2023 pual hian Kolasibah thing tiak 10,000 a thawn a semchhuah tur ruahman a nih thu a sawi.

Thutkhawm a tarlan danin kum 2021-22 ‘Green Mizoram day’ pualin thing tiak 2,857 phun a ni a, ram kang tur venna kawnga hma la tha khua endikna kalpui mek a nih thu sawi a ni. Kumin hian ‘Thingphun ila, I enkawl zui ang u’ tih thupui a hman tur a nih thu leh kan thing phun te enkawl puitlin an nih theih nana mawhphurhna chu EF&CC Department-a thawktute mai piah lam ah khua leh tui tha kan nihna ang a kan zavai mawhphurhna a nih thu DFO chuan a sawi a.

Sawrkar Office hrang hranga hotute leh khawtlang hruaitute chu hemi kawng a thawhpui ah a sawm nghal bawk a ni. June ni 9, 2023-a Green Mizoram Day lawmna pual hian Excise & Narcotics Department Complex, Khuangpuilam leh BDO Thingdawl Compound-ah te thing phun tur a ruahman a ni a, hemi bakah hian Office, School leh Pawl anga thing phun duh tan a thlawn a semchhuah tur thing tiak 10,000 ruahman a ni bawk.