618/2023-2024

2023 Ṭomir thla ni 29: Rural Development (RD) Minister Pu Lalruatkima chuan vawiin khan Lawngtlai tlawhin, RD Department hnuaia District Rural Development Office (DRDO) leh Block Development Office (BDO)-a thawktute nen inkawm hona hun an hmang.

Minister hi RD Department aṭangin Additional Secretary Pi Irene Zohlimpuii Chongthu, Joint Secretary Pi Ethel Rothangpuii, MzSRLM Chief Executive Officer Pi H. Lalchhandami leh Deputy Secretary Pu Zoremthara Ralte bakah, Minister Private Secretary Dr John Lalrinawma leh official dangte'n an rawn ṭawiawm a. DRDO office-ah hian Lawngtlai DRDO Project Director Pi Marilyn Rualzakhumthangi leh thawktu dangte'n lo dawngsawngin, officer leh staff-te nen an hna thawhna kawnga harsatna leh mamawh an neihte bakah, hmasawnna tur hrang hrangte an sawi ho a ni.

Minister chuan RD Department hnuaia thawktute inpekna leh thawh rimna avang leh mipuite nena thawh hona ṭha tak avangin Mizoram chu India ramah scheme leh project ti ṭha berte zingah a tel tih sawiin, lawm thu a sawi a. RD Minister a nih hnuah kum 4 chhungin MGNREGS-ah ni 100 inhlawhna an siam zat zat thei tih sawiin, kumin kum tharah pawh ni 100 inhlawhna siam leh theih beisei a ni a, kum 5 chhungin "Ni 100 inhlawhna" tih hming putu MGNREGS chu a hming ang ngeia dik taka kalpui theih a ni tur chu lawmawm a tih thu a sawi. RD Department hnuaia scheme hrang hrang kal tlangin Mizoram hmun hrang hrangah, thingtlang kilkhawr ber thlengin hmasawnna ruhrel tam tak din niin, tuihna humhalh leh tihpun kawngah te, faina leh thianghlimna kawngah leh mipuiin eizawnna ngelnghet an neih theih nan te hma lakna kalpui niin, hmasawnna hmuh tur tam tak a awm tih a sawi a. Office building leh thawktu quarters thar sak belh a nih bakah, thawktute hamṭhatna hrang hrang pawh ngaihtuah niin, hmasawnna tam tak a awm tih a sawi bawk.

RD Department-a thawktute chu anmahni dawrtute'n an hriat thiam loh leh an hriat duh te dawhthei taka lo hrilhfiah a, mi retheite innghahna leh tluk luh ngamna nih tum zel turin a chah a. Sawrkar hna thawkte tan social media hman dan thiam a pawimawh tih sawiin, thawktute chu an thiamna tuai hriam zel tur leh ṭha zawka hna thawh tum zel turin a chah a ni.

RD Department Additional Secretary Pi Irene Zohlimpuii Chongthu, Joint Secretary Pi Ethel Rothangpuii leh MzSRLM Chief Executive Officer Pi H. Lalchhandami te pawhin thu sawiin, RD Department hnuaia hma lakna hrang hrang an sawi fiah a. Scheme hrang hrang chungchang leh thawktute chungchang kawng hrangin sawi ho zui a ni bawk.

RD Minister hi zaninah Lawngtlaiah a riak ang a. Naktuk khian Bungtlang South-ah BDO office leh RD Rest House te a hawng dawn a ni.