No.1457/2020-2021

Lawngtlai, Tomir thla ni 29, 2020: Rural Development leh Information & Public Relations, etc. Minister Pu Lalruatkima chuan vawiin khan Lawngtlai District chhimchhak lama Myanmar ramri bul khua Zochachhuah leh Hmawngbuchhuah tlawhin, COVID-19 laka Mizoram a him nana ramria ral veng village level task force (VLTF)-te nen inkawm hona hun an hmang.

Minister chuan COVID-19 vanga khawvel pumpui a buai laiin khawvel economy pawhin a tuar tih sawiin, Mizoram sawrkar chuan he hripui laka ram leh mipui him nan mai bakah chhuanchham an awm loh nan theih tawp a chhuah tih a sawi a, mipuite paw'n ei leh bara intodelh turin lo neih leh chuktuah huan siam lama tan lak a tul thu a sawi. Mizoram chu India rama lockdown puang hmasa ber state kan nih bakah, tun dinhmuna case nei lo awm chhun kan ni tih sawiin, chu chu lungthu pathum - sawrkar, tlawmngai pawl leh kohhran te lungrual taka tan tlanna rah a ni, a ti a. Ram mipuite kan tang rual tha hle a, he hripui hi tan rual loh chuan do hneh mi a nih loh avangin pawl pawl sawi lova khua leh tui zawng zawng tan rual zel a tul a ni, a ti.

Minister chuan phut let nei hauh lova ram leh hnam tana ramri veng himtute thawh rimna a taka hmuhpui tura thawk chhuak an nih thu sawiin, chuti ang mite chungah chuan lawm thu a sawi a, tha thlah lova tang tlat turin a fuih.

COVID-19 karah a enkawl RD department hnuaia mipuite khawsak tihawlsam nana ni za inhlawhna kalpui zel a nih thu tar langin, nikumah ni 100 inhlawhna siam theih a nih angin kuminah pawh advance-in ni 26 tihchhuah a ni a, tunah ni 14 thawh mek a ni tih a sawi a. He lai biala hma sawnna hna thawh tur khaw pali tan solar hmanga tui lakna leh khaw pahnih tan community hall sakna tur sanction a awm thu a sawi bawk.

Minister hian border area-a VLTF hrang hrangte chu an dinhmun leh harsatnate a zawt fiah a. A hnena an thil thlente chu baqhzuisak a tum thu sawiin, an mamawh tur medical supply, silpauline leh pawisa fai te a hlan a. MNF General Headquarters chuan VLTF-te tan silpauline leh pawisa fai an hlan ve bawk. Hemi rual hian MzSRLM-in hmui tuamna (mask) an thuitir 4000 chuang, khaw hrang hranga VLTF-te hnena sem atana Minister leh Bungtlang BDO kuta an hlan chu he'ng an tlawh khuaa VLTF-te hnenah hian an hlan nghal bawk.

Minister hian tukin zingkar khan Lawngtlaia DRDA office, BDO office leh District Information & Public Relations office te bakah, Bungtlang BDO office te tlawhin, an mamawh leh harsatna an neihte a sawipui a ni.

Minister hi official atangin Lawngtlai DRDA Project Director Pi Marilyn Rualzakhumthangi, Lawngtlai BDO Pu Lalremruata Sailo, Bungtlang BDO Pu Hmingmawizuala, Lawngtlai DIPRO Pu C. Lalhruaitluanga te'n an tawiawm bakah, LADC-a MDC-te leh MNF party hruaitute'n an tawiawm a ni.