No.1458 /2020-2021

Vawiin khan Champhai DC Pu Mark Lalthanliana hovin Champhai district mi leh sa lo haw mekte lo dawnsawn dan tur leh inpuahchahna hrang hrangte sawi hova inrawnkhawmna hun DC Conference Hall-ah neih a ni.

Bawrhsap Pu Mark Lalthanliana chuan State pawn a tangkhang haw runpui hmabak awmah mawhphurhna hrang hrang chelhtute inkarah tanruala thawhhona tha tak awm a tul thu a sawi a. Inrawnkhawmna leh sawihona chuan rah tha tak a chhuah a beisei thu sawiin, Champhai district a thawhhona tha tak awm chu fakawm a ti a, fimkhur tak chunga theihtawp chhuah chhunzawm zel turin a chah a ni.

He hunah hian tangkhang lo hawte dawnsawn dan leh Quaratine Centre hrang hrang dinhmun leh tul awm angte sawiho niin, lo thleng hnaivai turte dawnsawn leh dahluhna turte peihfela inrin anih tawh thu tarlan a ni a. A nawlpuia haw te mai bakah Lirthei dang hmanga rawn hawte leh damlo phai lama inenkawl lo haw te dawnsawn dante pawh sawiho a ni a. Heng bakah hian venhim hna, tui leh eng, ei leh in leh mutbu ruahman anih dan tlangpuite he hunah hian tarlan a ni.

Ruahman dan chuan Karnataka atanga lo haw mek mi 90 dawn (Mipa 43, Hmeichhia 47) Champhai rawn pan mekte chuan zanin emaw, naktuk zingah Champhai an lo thleng dawn a. Mipate hi PCI Vengthlang Kohhran Community Quarantine Centre Chhanchhuahna In, New Champhaiah khunghran tur niin, Hmeichhia te hi Tourist Lodge Champhai ah khunghran an ni ang.

Naktuk hian Gujarat leh Madhya Pradesh atanga lo hawte pawh Champhai lo thleng hman tura beisei an ni a. Gujarat atanga lo haw hi an vaiin mi 22 niin, Mipa 5 te PCI Hunthar Kohhran Hall Community Quarantine Centre, Hmunhmelthaah dahlut an ni ang a, Hmeichhia 17 te chu PCI Hospital Veng Kohhran Hall Community Quarantine Centre-ah dahlut an ni ang. Madhya Pradesh atanga lo haw mi 20, Mipa 3 leh Hmeichhia 17 te PCI Vengsang Kohhran Hall Community Quarantine Centre-ah dahlut an ni bawk ang.

Ruahman dan chuan Delhi atanga lo haw mek Champhai district mi leh sa mi 114, Mipa 40 leh Hmeichhia 74 te chuanna Relin Bairabi naktuk May Ni 30 hian a thleng anga, a tuk maia Champhai thleng tura beisei a ni a, an ni hi Tlangsam Polytechnic Quarantine Centre ah khunghran tum an ni a. Goa atanga lo haw ten Pathianni May Ni 31 hian Bairabi an lo thleng dawn a, a tuk Thawhtanni, June Ni 1 hian Champhai an lo thleng dawn a, an vaiin mi 65 niin, Hmeichhia 43 te PCI Venglai Kohhran Hall Community Quarantine Centre--ah dahlut an ni dawn a, Hmeichhia dang 8 leh Mipa 14, an vaiin mi 22 te chu PCI Electric Veng Kohhran Hall Community Quarantine Centre-ah dahlut an ni ang. Kawnglakah Uttarakhand atanga lo haw mek mi 4, Mipa 3 leh Hmeichhia 1 an awm thu leh buaipui dan turte pawh sawiho a ni. He hunah hian Veng/khaw thenkhata mahni mi leh sa te lo khunghrana buaipui duh thu thlente pawh sawiho a ni bawk.

Heng bakah hian Mumbai leh Pune atanga lo haw ten June Ni 2 (Thawhlehni) hian Bairabi lo thlengin, a tuk June Ni 3 (Nilaini) hian Champhai lo thleng tura beisei an ni. Mumbai atanga lo haw tur hi mi 45 an ni a, Mipa 15 te PCI Kahrawt Kohhran Hall Community Quarantine Centre-ah, Hmeichhia 30 te PCI Kanan Kohhran Hall Community Quarantine Centre-ah khunghran an ni ang a. Pune atanga lo haw mi tur in report hi mi 53 niin, Mipa 19 te Zotlang Presbyterian English School Community Quarantine Centre-ah khunghran tur an ni a, Hmeichhia 34 te PCI Zotlang North Kohhran Hall Community Quarantine Centre-ah khunghran an ni ang.

Tangkhang lo hawte hi Vanlallawma Indoor Stadium, VANIS Kahrawt ah lo dawnsawn leh tur an ni a. Rapid Test Team 3 leh Medical Screening Team 2 siam ani ang a, District Official ten thutchilhin, Security tha tak ruahman a ni. Hetih mek lai hian Tamil Nadu atanga lo haw mi 66 (Mipa 29, Hmeichhia 37) ten naktuk hian khunghran hun ni 14 hmang zoin anmahni khunghran mekna Tlangsam Polytechnic Quarantine Centre an chhuahsan tawh dawn a ni.

Vawiin Meeting-ah hian Champhai SP Pu Rex Zarzoliana bakah Nodal Officer te, Incident Commander te, District Medical Board Member leh Official dangte an tel a ni. Meeting zawh hnu hian Bawrhsap, SP leh Official te hian PCI Vengthlang Kohhran enkawl, Community Quarantine Centre tura buatsaih Chhanchhuahna In, New Champhai chu tlawhin an enfiah nghal ani.