No.2509/2021-2022
Aizawl the 7th October 2021: Rampum Covid-19 dona thuamchak nan PM CARES hnuaia bultum sak PSA Oxygen Plant chu Mizoramah pawh hmun 13-ah bun tura thlan a ni a, chung zinga Oxygen Plant pakhat chu vawiin khan Rural Development, etc. Minister Pu Lalruatkima chuan DCHC, Kulikawn Hospital, Aizawl-ah a hawng. He hunah hian Aizawl South-II Bialtu MLA Pu Lalchhuanthanga leh Health Department officials engemawzat an tel a ni.

Oxygen Plant hawnna inkhawm Dr.P.C.Lalliannghaka, Dy. Medical Superintendent, Kulikawn Hospital kaihhruaiah Khuallian Pu Lalruatkima chuan nikum March thla tawp lam atanga Mizoram chenchilh mek Covid-19 hri dona atan sorkarin thiam ang tawkin ruahmannate a siam thin a; mipui, Kohhran leh NGO-te nen pawh thawhhona a thain sawrkar hmalakna pawh an thlawp that thin avangin lawmawm a tih takzet thu a sawi a. He hrileng hian Mizoram chauh ni lo, khawvel pum hi a kian san hlei thei si lova, sawrkar ropui berte tan pawh a manganthlak takzet a ni a ti. He hri dona kawngah hian a bik takin Health Department-a thawkte an hah em em a, hrileng karah pawh hlauh pawh sawi lovin Covid hri kaite an enkawl a, anni bakah veng leh khaw tinah Local Task Force ten mipuite kaihhruai leh thunun hna hautak tak an thawk bawk a ni tiin Minister chuan an inpeknaah lawmthu a sawi..

Minister Pu Lalruatkima chuan Covid-19 hripui avangin natna leh thihna hial kan tuar a, Central sawrkar pawhin State sawrkarte nen inrawn tlang zelin theihtawp a chhuah mek zel a. Covid vei damlote hi a tlangpui thuin oxygen mamawh tak tak an ni hlawm a, Oxygen tlakchham avanga nunna chan thei dinhmun a ding an ni zel a, hemi hre rengin Prime Minister zahawm tak ruahmannain sawrkar laipui chuan India ram chhunga State leh UT hmun hrang hrangah PM Cares Scheme Fund atanga Oxygen Plant siamna atan hma a la a, a takin chu chu Mizoram State pawhin a zar a zo thei dawn a; tun hunah hian state hmun hrang hrang 13-ah he PSA Oxygen Plant hi bun a lo ni thei ta chu a lawmawm takzet a ni a ti. Hmun tinah Covid hri kai an pun zel avangin he Oxygen plant hi a rang thei ang bera hman theih tura ruahman a ni a, Covid hri avanga damlote enkawlna atana ruahman ni mahse nakin zelah pawh damlo, Oxygen mamawh tak tak helai damdawi ina lo tlu lut ten an hman tangkai zel a beisei thu a sawi a. Mizoramin hetiang health facilities tha a neih theihna kawnga Health Minister zahawm tak leh Department a thawhpuite hmalakna a chhuanawm takzet a ni tiin duhsakna sang ber a hlan bawk.

Dy. Medical Superintendent, Kulikawn Hospital Dr.P.C.Lalliannghaka chuan PSA Oxygen Plant hawn tak hian minute khat chhungin oxygen litre 250 a siam chhuak thei a, a full capacity chu litre 500 a ni tih a sawi a. DCHC, Kulikawn Hospital-a Oxygen Plant hi ni 28.9.2021 khan bunfel niin enchhinna (trial run) neih nghal a ni a, 93.4% Oxygen hlang (oxygen purity) a pechhuak thei a ni. He PSA Oxygen Plant atang hian pipe hmangin ward chhungah damlo khum tinah leh nau neihna room-ah port 1 vuah a ni.

Attachment

  • Loading attachment...