No.2510/2021-2022
Aizawl 7th October, 2021 : Vawiin khan Dr. Lalrozama, IAS, District Bawrhsap chuan District Hospital, Mamit-a hman tur, PMCARES Fund atanga dawn PSA Oxygen Plant a hawng.

Vawiin Oxygen Plant hawnna hunah hian District Bawrhsap chuan Mamit District tana thil chhinchhiahtlak tak mai leh nunna hlu tak chhan nana Oxygen Plant Mamit District Hospital-in kan nei ta chu lawmawm a tih thu a sawi a. Hrileng mek kara awm kan nih avanga Prime Minister hmalakna hnuaia Mizoram chhunga District tinte'n damlo mamawhtute chhanchhuaha an awm theihna tura Oxygen khawl kan han nei ta chu a hlu-in a lawmawm hle a ni a ti. He khawl pawimawh tak mai kan neih theihna tura nasa taka hun leh tha, ngaihtuahna sengtu Health Department-te leh a puibawmtu Department dangte chungah lawmthu sawiin, a enkawl zui zelna kawngah leh a mamawhtute'n tangkai zawka an hman theihna tura vil zui kawngah theihtawpchhuah zel turin Department thuneitute a chah.

District Bawrhsap chuan hrilengin min kiansan lam aia zual lam a pan zel laia inkhuahkhirna lam phelh dul hret hret a nih avang hian hrileng hi a hlauhawm ta lova, inven kan ngai ta lo tihna a ni lova. Ei leh bar zawn kawngah mipuite'n harsatna kan tawhna hrereng chunga invenna tha taka kalpuia, kan khawtlang nuna khawsak rel kan kalpui chu sawrkar duhdan a nih thu a sawi.

Dr. Lalrinfela H, Senior Medical Officer, chuan technical report pe-in PSA (Pressure Swing Absorption) Oxygen Plant chu PMCARES Fund (Citizen Assistance and Relief in Emergency Situation) atangin Covid-19 Second wave dona atana pek kan nih thu sawiin, he Oxygen plant pek phalna hi Ni 18.6.2021 khan MoHFW atangin hmuh a ni a. PSA khawl hi Titagard Bridges and International Pvt.Ltd Kolkatta te siam niin Rs. 61,36,000 man a ni, Minute khata oxygen a pekchhuah theih zat hi 500 litres niin darkar khat chhungin 7,20,000 litres a pe chhuak thei a, chumi chuan pipeline-ah press lutin damlote'n an mamawh ang zelin an khum bul atangin an dawng thei dawn a ni. Khawl Housing hi Mizoram State Sawrkar-in a tih ve tur a nih angin Departmental Work a kalpui a ni a, central lam nawr hmanhmawhna a nasat tawh vangin karkhat chhungin Zamzo Engineering Construction & Consultancy te'n an sa zo a ni. Tun dinhmunah Mamit District Hospital-a damlo serious te'n Oxygen an mamawhna a sang hle a, damlo pakhat hian minute khatah litre 15-20 te mamawh thin niin cylinder ringawt hi chu a zo chak em em a, hetih laia 500 LPM PSA kan nei tur chu a lawmawm thu leh nasa taka District Hospital-in an chhawr ngei a beisei thu a sawi. Medical gas pipelines, ward-a khum bul tina dah tur hi Mamit rawn thleng tawhin vawiin atang hian hna thawh tan mek a nih thu a sawi bawk.

He hun hi Dr. T. Lalrintluanga , MD, DMS chuan kaihruaiin, Dr. Lalzuatliana, Senior Medical Officer chuan lawmthu a sawi a. Upa Lalchhuanawma, Pharmacist, District Hospital chuan Oxygen Plant Pathian hnena hlanna a nei nghal bawk.

Vawiin PSA Oxygen Plant hawnna hunah hian Pu Vineet Kumar, IPS, SP Mamit, Dr. Zothankhuma Chhakchhuak, CMO bakah khawtlang hruaitute leh Health Department-a thawktute an tel a ni.

Attachment

  • Loading attachment...