No.2511/2021-2022

Aizawl, the 7th October, 2021: Mizoram sawrkar Health & Family Welfare Board Vice Chairman Dr. Z.R Thiamsanga, MLA, Champhai North chuan vawiin chawhma dar 10:30 khan Oxygen siamna khawl Pressure Swing Adsorption (PSA) Oxygen Generating Plant, minute khata Oxygen litre 500 siam chhuak thei Prime Minister's Citizen Assistance and Relief in Emergency Situations (PM CARES) Fund kaltlanga bunfel chu District Hospital Champhaiah a hawng.

Hawnna puala inkhawi buatsaihah thusawiin Dr. Z.R Thiamsanga chuan Oxygen Plant lian leh changtlung zawk Champhaia bunfel ani ta chu Champhai khawpui mai ni lo Mizoram pum ang pawha ni chhinchhiah tlak tak a nih thu a sawi a. Oxygen Plant lian minute khata Oxygen litre 500 siam chhuak thei PM CARES Fund kaltlanga dawn chu Covid hrivei oxygen mamawhte tan mai nilo nakin thlenga Champhai District-in a chhawr tangkai chhunzawm zel tur a ni, a ti a. Champhai District in an mawmawh em em RT-PCR bunna tur hmunhma drawing peihfel a nih tawh thu leh, a hnunhmate enfiah turin Champhai District bialtu MLA pathum ten mithiamte hruaiin karleh lamah Champhai an tlawh tur thu a sawi a. TrueNat khawl RNA Extractor pawh Champhai tan pek belh a nih dawn thu sawiin, District Hospital Champhaia hnimhlum Doctor appointment ngheta dah tura ruahmanna siam a nih thu pawh a sawi bawk.

Covid-19 hrileng dolet kawngah sawrkar, khawtlang hruaitu, NGO leh kohhrante thahnemngai taka theihtawp chhuaha an tangho thin chu fakawm a tih thu sawiin, Covid-19 in min chenchilh tawh avangin dan chah mai a har tawh a, hrileng laka himna tur hmai tuam, kut silfai leh inkaihhruaina dangte tha taka zawm tlat a ngai a ni, a ti a. Mizo khawtlang nunah intlawhpawh leh inlenpawh a tam avangin hrileng laka him nan tih loh hram hram leh a loh theih loh chinah chuan himna tura Covid Appropriate Behaviour-te zawm hram hram a ngaih thu a sawi a. Vaccine pek kawngah sawrkarin chak taka hma a lak zel thu leh vaccine kan intodelh thu sawiin, vaccine la theite vaccine la vek turin a chah a. Vaccine pek chhuah kawngah Mizoram chu State titha berte zinga mi a nih thu sawiin, Covid Appropriate Behaviour zawm that leh Covid vaccine lak that chu invenna tha leh kan neih chhun a ni, a ti bawk.

Champhai District chhunga hrileng dona kawnga hmalakna leh thawhhona tha tak a awm chu chhuanawm tiin, lungrual taka thawkho zel turin a chah a. District Hospital cheibawl leh thawmthat kawngah sawrkarin theihtawp a chhuah zel dawn thu a sawi bawk.

He hun hi District Bawrhsap Pi Maria C.T Zuali chuan kaihhruaiin kalkhawmte lawmna thu a sawi a. Khuallian hovin khawl thar enfiahna neih niin, Dr. Lalnuntluanga Ralte, In-charge PSA Oxygen Plant in khawl hnathawh dante a sawifiah a. Dr. Zatluanga, DMS Champhai in lawmthu sawia hun a khar hnuah Prime Minister-in AIIMS Rishikesh, Uttarkhand atanga India ram puma PSA Oxygen Plant 35 hman theih tura a hawnna program chu District Hospital Champhai PSA Plant tual atanga zawm a ni.

PSA Oxygen Plant bunfel hna hi DRDO chuan thawkin CPWD in a hmunhma a buatsaih thung a. CPWD chuan kumin June ni 6 khan enfiahin June ni 30 ah Civil Work a kalpui tan a, Civil work July ni 24 khan zawhfel a ni. Thla hmasa September ni 23 khan PSA Oxygen Plant hian Champhai a thleng a, a tukah Gaskon Engineers ten bunfel hna an thawk nghal a, ni hnih chhung thawkin September ni 25 khan peihfel a ni a, hemi ni vek hian P&E Department nena tangkawpin enchhinna neih a ni a. 500 LPM PSA Plant leh tuna hman mek 80 LPM Plant Pipeline zawm hna hi September ni 29 khan thawh zawh niin, Hosco Pvt. Ltd chuan an thawk a, hemi ni vek hian Security leh thawktute hnena hrilhfiahna hun neih a ni a. October ni 5 khan a bika ruat 250 KVA Transformer pawh bunfel a ni.

PSA Oxygen Generating Plant thar hi District Hospital Eye Ward Building, Ground Floor-ah bunfel a ni a. Tuna District Hospital Champhaia Oxygen Generating Plant hman mek hi minute khata litre 80 (80 LPM) siam thei niin, vawiina hawn fel tak nen hian District Hospital Champhaia Oxygen Generating Plant pahnihte tangkawp hmangin minute khatah Oxygen litre 580 (580 LPM) siam chhuah a ni thei tawh dawn a ni.