No.2512/2021-2022
Aizawl, the 7th October, 2021: Vawiin khan Environment Forests &Climate Change Department chuan India ramin zalenna a neih kum 75 na lawmna kal zelah Azadi Ka Amrit Mahotsav Iconic Week 2021 hawnna hun chu Tamdil-ah an hmang a. EF&CC Minister Pu TJ Lalnuntluanga chu khuallian niin Saitual DC Pu VL Hruaizela Khiangte chu khualzahawm a ni.

Minister Pu TJ Lalnuntluanga chuan thusawiin Tamdil bul vel ramngaw that avangte leh khualzin hip theitu tha tak a nih avangin State Forest Department chuan Tamdil venhimna leh tihhmasawn nan hma a la reng a ni, a ti a. Tamdil hmangaihtu (Wetland Mitra) mi engemaw zat kal khawmte hnenah Tamdil phochhuahna atan leh hma a sawnna tura hma an lak tawhna te a fak a, theihtawp chhuah chhunzawm zel turin a chah nghal bawk a ni

Tha lehzuala Tamdil enkawl a nih theih nan leh mipuiin an hlawk pui zawk theih nan EF&CC Department chuan a huhova enkawl dan tur Integrate management Plan a buatsaih chu State Wetland Authority in a pawm hnuah tunah hian Ministry of Environment, Forest & Climate Change hnuaia peng pakhat National Plan for Conservation of Aquatic Ecosystems (NPCA) chuan a pawm fel tawh thu Minister hian a sawi a. Tamdil in hma a sawn theihna turin Tourism leh Fisheries Department te nen thawhhona tha an neihna turin hma an la mek a ni, a ti bawk.

Tam dil chhehvel khaw mipui tan eizawnna ngelnghet zawk siamsak turin kumhlun thlai chingte tanpuina chhungkaw 206 hnenah cheng nuai 103.00 man hu pek tum a ni a, kum 4 dang la pek leh zel tur a ni tih Pu TJ Lalnuntluanga chuan a sawi a. Forest Department hmalakna thenkhat leh la tih leh tur hrang hrang sawiin a khaw chhehvelin an khaw rama ramngaw siam belhna atana pawimawh - Permanent nursery siam a nih thu te; ramngaw awmsa humhalh bakah a chereu lai ngaw a siam belh te; Tam Dil tichhe thei ven nan research neih mek a nih thu te; Interpretation hall, Watch tower leh Rope Way siam a nih thu te; tlawhtute hman atan Tamdil-ah hian Lawng bakah a sirah Swimming Pool te siam niin, Rest Shed te pawh dah a nih thu EF&CC Minister chuan a sawi a ni.

He hunah hian wetland mitra thutiam kalkhawmten an chham a, thing phunna hun hman a ni bawk a ni.

He Programme ah hian Principal Conservator of Forests (PCCF) Pu Jintendra Kumar chu Chairman a ni a. Saitual DC Pu VL Hruaizela Khiangte chuan thusawina hun a hmang a. Pu RS Sinha, Chief Wildlife Warden chuan lawmthu sawiin hun hnung a khar a ni.