No.2513/2021-2022
Aizawl, the 7th October, 2021: Vawiin khan District Disaster Management Authority (DDMA), Khawzawl District leh State Disaster Response Force, 2nd IR Battalion-te tangkawp chuan Zuchhip Branch YMA Hall, Khawzawlah chhiatrupna thlen thulha chechhuak hmasa thin, DM&R First Responder-te tan training an buatsaih a, he hun hi Pu C.C. Lalchhuangkima, Deputy Commissioner & Chairman, DDMA, Khawzawl District chuan khuallian niin a hmanpui.

Training hawnna hun Pu H. Lalramenga, SDC & Nodal Officer, DM&R kaihhruaiah Pu C.C. Lalchhuangkima chuan thu sawiin, Chhiatrupna a lo thlen chang leh, chhiatrupna thleng thei laka lo invenna kawnga First Responder a bikin YMA, 2nd IR Bn leh Quick Response Team-te hmalakna leh hnathawh tawh chu a lawmawm hle a ni, a ti a. Chhiatrupna a lo thlen changa pawimawh hmasa ber zinga mi, DM&R bungrua duh ang hman tur awm thin lo pawh ngaihtuah belh mek zel a ni tih tarlangin, rilru inhawng leh hmasawn duhna rilru pu chunga training hmachhawn turin kalkhawmte chu a chah a. A bik takin YMA chu chhiatrupna a thlen changa tlawmngaia che chhuak hmasa an nih thin avangin training-ah pawh ngaihpawimawh an ni tih a sawi bawk.

DM&R First Responder training-ah hian State Disaster Response Force, 2nd IR Battalion atangin SDRF member pahnih - Nk. PC Lalhmangaihzuala leh Constable Michael Laltlanzauva ten kalkhawmte zirtirna an pe a. First Responder-te tana hriattur pawimawhte sawiin, damlo leh hliam tuar bawihsawm dan leh hmun hima lak sawn dante, DM&R hmanraw pawimawh leh hman tlanglawn deuhte hman dan chipchiar practical in zirtirna an pe a. Zawhna leh chhanna hun hlawkthlak tak hman a ni bawk a ni.

Vawiina training hi Mizoram Sawrkar, DM&R Department kaltlanga State Disaster Response Fund dawn atangin buatsaih a ni a. DDMA hnuaia Quick Response Team, Khawzawl District member-te, Sub-Headquarters YMA a DM&R Sub-Committee member-te leh DC Office staff thenkhatte telin, trainer-te leh training-a telte hi training certificate pek vek an ni.