No.4246/2021-2022
Aizawl the 11th March, 2022: Sorkar laipuia Ministry of Rural Development ruahman angin Mizoram sorkara Rural Development Department chuan ‘Azadi Ka Amrit Mahotsav’ hnuaiah vawiin khan Aijal Club Conference Hall-ah International Women’s Day pualin State Level Felicitaion Function a buatsaih a. He hunah hian Rural Development Minister Pu Lalruatkima chu Khuallian niin Mahatma Gandhi NREGA hnuaia Hmeichhia Puitu (Women Mates) titha mi 10 leh State Rural Livelihood lama hmeichhe beneficiary titha mi 10-te hnenah lawmpuina certificate, memento leh sumfai Rs.2000/- theuh a hlan a ni. Vawiin vekah hian Aizawl khawpui bakah Mizoram chhunga District Capital dang 10-ah International Women’s Day pual hian MGNREGS leh SRLM hnauaia hmeichhiate chawimawina leh alwmpuina hun hi hman a ni bawk a ni.

Aijal Club-a MGNREGS leh MzSRLM hnuaia hmeichhe hnathawk thate chawimawina inkhawm Rural Development Jt. Secretary Pi Irene Zohlimpuii Chongthu kaihhruaiah Khuallian Pu Lalruatkima chuan Self Help Groups leh MNREGA hnuaia ‘Women Mates’ zawng zawngte chibai bukin vawiin ang hun chhinchhiahtlak tak mai hman theih a nih hi a lawmawm takzet a ni a ti. RD Department hmalakna ten rah chhuah tha tak a nei mek zel a, hnathawktu tha leh hlawhtling chawimawi tlakte an chhuanawm takzet a ni a ti bawk. India Sawrkar Scheme pawimawh tak pahnih - MGNREGS leh Rural Livelihood Mission-te hi kalphung leh inkaihhruaina fel tak a nei a, chumi zulzui chuan India ram State hrang hrangah hmasawnna duhawm tak mai hmuh leh siam mek a ni a, Mizoramah ngei pawh heng Scheme kaltlang hian thingtlang zawkah te hmasawnna tam tak a thleng mek bawk tih a sawi a. MGNREGA hnuaia Ni 100 inhlawhna kalpui dan tur leh a tul anga sawrkar official-te lo tawiawm leh sawrkar hmalakna tichak turin ‘Women Mate’ te chu theihtawp chhuah zel turin a chah. Department official-ten engtiklai pawhin hnathawhte a hmunah an vil reng hman lova, chumi indaih lohna leh hna tha taka thawh a nih theih nan hnathawkte lo vila, a tul anga lo kaihruai turin ‘Women Mate’ an inpekna a chhanawmin a entawn tlak a ni a ti. MzSRLM hnuaia Self Help Group-te hmalakna leh hmasawnna hrang hrang a hmuh leh hriat chuan a tilawmin an hlawhtlin dante a ngaihnawm a tih thu a sawi a. Sawrkarin Community Investment Fund a pekte leh Bank loan an lak te, tangkai taka hmangin, eizawnna ngialnghet tak neia an sum lakluhte nasa takin an tipung thei thuaina chuan an tum ruhna leh taimakna a lantir a, mi zawng zawng tan entawntlak an tling a ni a ti. Sawrkar-in Self Help Group-te hi a ngai pawimawh em avangin Community Investment Fund an dawn turte chu a hun taka an dawn zelna turin theihtawp chhuahin hma a la zel dawn a ni a ti bawk. Vawiina kalkahwm Self Help Group Member-te chuan an dinhmun mekah hian duh tawk mai lova, an theihnate tipunga hmasawn lehzual thei turin duhsakna a hlan.

Khuallian RD Minister Pu Lalruatkima chuan thu a sawi zelnaah Mizoramin Covid 19 avanga harsatna a tawh lai leh Lockdown chhung pawha harsatna an tawh loh nan Sorkarin Self Help Group-te tana hmalakna hrang hrang leh Community Funds pekchhuah chungchang pawh a theih ang angin a kalpui reng tho a ni a ti a. Thufingin ‘Mipa hlawhtlinna phenah hian hmeichhe ropui tak an awm thin’ a tih angin, Self Help Group leh Women Mate te chuan ramin hlawhtlinna a hmuh theihna leh hmasawnna rahbi a rah theihna kawngah chanvo pawimawh tak leh hlu tak, Sawrkar hmalakna phenah in chelhin in awm tlat a ni tiin a fuih a. Engkimah taimakna, tumruhna leh rinawmna nen ramin hmasawnna kawng a zawh theihna turah theihtawp chhuah tlang theuh turin kalkhawm zawng zawngte a sawm a ni.

He hunah hian Pi H. Lalchhandami, CEO, MzSRLM leh Pi Ethel Rothangpuii, PD, DRDA Aizawl hennan atangin hmeichhe chawimawite chungchang Report ngaihthlak a ni a. Women beneficiary tithate chanchin thlirho a ni bawk. Pu R. Lalthazuala, Director, Rural Development Department chuan lawmthu sawiin hun a khar a ni.

Mizoram State Rural Livelihood Mission-in a tum ber chu thingtlang mi retheite, a bikin hmeichhiaten eizawnna mumal an neih theihna tura hmalak a ni a. Chumi atan chuan Self Help Group din a ni thin a. Tun dinhmunah hian Self Group Member 71,432 an awm mek a ni. Heng Self Help Group member-te hi an mamawh dan azirin an eizawnna atana thiamna nei turin training hrang hrang pek thin an ni a. Ranvulh, lo neih, sumdawnna kalpui dan tur, Bank dawrdan, sumkhawl dan te leh thil chi hrang hrangte zirtir thin an ni a. Eizawnna bul an tanna atan hian training bakah sum an mamawh avangin Sorkar atangin Loan anga an puk kual tur Community Funds pek thin an ni a. Chung Community Funds zinga pakhat chu Community Investment Fund (CIF) chu Self Help Group intelkhawm Village Organisation-te kutah pek thin a ni a. VO-te chuan Self Help Group-te an puk tir chhawng veleh a, Self Help Group atangin an member-ten an lo puk chhawng veleh ta a ni. Hei bakah hian mi nawlpui tana lak mai harsa Bank loan hi SHG member tan chuan awlsawm zawkin an la thei bawk a. Heng CIF leh Bank loan leh training hrang hrang MzSRLM kaltlanga an dawnte chhawr tangkaia an sum lakluh lo pung ta mi 10-te leh MGNREGS hnuaia hna hrang hrang viltu/puitu hnathawk tha ‘Women Mates’ 10-te hnenah vawiin khan chawimawina pek a ni :-
I. Women Beneficiary:
1. Vengsiami, Kelkang, Champhai RD Block, Champhai District
2. H. B. Luni, Leisenzo, Khawbung RD Block, Champhai District
3. R. Vanlalzuali, Reiek, Reiek RD Block, Mamit District
4. Lalchhanhimi, Lallen, W. Phaileng RD Block, Mamit District
5. Sangremi, Sangau IV, Sangau RD Block, Lawngtlai District
6. Ampuri, Vaseikai, Bungtlang ‘S’ RD Block, Lawngtlai District
7. Sona Chakma, Nalbonia, Chawngte RD Block, Lawngtlai District
8. Lalneihchhungi, Chawngtlai, Khawzawl RD Block, Khawzawl District
9. Ningkhawchin, Teikhang, Ngopa RD Block, Saitual District
10. Pamzingi, Noaotla, Siaha RD Block, Siaha District

II. Women Mate:
11. H. Lalchhanchhuahi, Aizawk, Aibawk RD Block, Aizawl District
12. Lalhriatzuali, Falkawn, Aibawk RD Block, Aizawl District
13. Lalchawimawii, Sumsuih, Aibawk RD Block, Aizawl District
14. P. C. Lalrosangi, Seling, Thingsulthliah RD Block, Aizawl District
15. C. Lalchamreii, Thingsul-Tlangnuam, Thingsulthliah RD Block, Aizawl District
16. Lalawmpuii, Thingsulthliah-II, Thingsulthliah RD Block, Aizawl District
17. Lalhmangaihzuali, Sairang, Tlangnuam RD Block, Aizawl District
18. Huntharchhuani, Sairang, Tlangnuam RD Block, Aizawl District
19. Lalrinawmi, Lengpui, Lengpui RD Block, Aizawl District
20. Juliet Zonuntluangi, Muthi, Tlangnuam RD Block, Aizawl District

Attachment

  • Loading attachment...