No.4245/2021-2022
Aizawl the 11th March, 2022: Kangmei ven kawnga inzirtirna zau zawk neih nise ti a Champhai District Level Fire Prevention Committee thutkhawmin a lo rel tawh bawhzuina kalzela Champhai District chhunga High School zirlaite puala essay inziahsiak, ‘Kangmei laka himna hi mitin mawhphurhna a ni’ tih thupui hmanga buatsaih result chu vawiin chawhnu dar 1:30 khan District Education Officer Chamber, Kahrawt vengah puan a ni.

He hun Pu T.T Laltanpuia, DEO Champhai kaihhruaiah hian Pu Lalhlupuia, Honorary Wildlife Warden, Champhai District chuan thu sawiin, kangmei ven chu Department bil tihtur nilo mitinte mawhphurhna a nih thu a sawi a. Kan ram leilung mawina leh hausakna, ram ngaw leh nungchate venhim hna chu tu kutah mah a innghat bik lova, kan zavaia mawhphurhna liau liau a ni, a ti a. Tul lova ram tihkan chu ram hmelma lian berte zinga mi a nih thu leh District chhung khaw hrang hranga tuitlan hnarte a kang chah mek zel thu sawiin, nakin lawkah chuan tui harsatna namenlo kan tawng thei dawn a, heng zawng zawng bultanna chu ram ngaw kan tihchereu chak luat vang a ni, a ti a. Kangmei chhuak chuan sik leh sa a nghawng nasat mai bakah, thing leh mau leh nungchate thlenga a suat tel thin thu a sawi bawk a. Nakin zela chenna tlak ram kan hnutchhiah theihna turin kan ram neih chhun venhim leh midangte zirtir kawngah bang lovin mahni zawnah theuh hma i la ang u, tiin mipuite a sawm a ni.

Thusawitu dang Dr. Lallawmkima, DIPRO Champhai chuan nikum lamah Champhai District-ah kangmei chhuak a tam thu sawiin, ram tikanglo turin District Level Fire Prevention Committee kaltlangin nasa taka tanlak mek zel a nih thu a sawi a. Hmalakna langsar zingah nakin lawka ram leh hnam innghahna tur zirlaite tel theihna tur programme duan a ni chu lawmawm tiin, zilrlaite chu an chhungte, thenawm khawveng leh thiante kangmei ven kawnga hmalak dan zirtirtu nih tum zel turin a fuih a ni.

Kangmei laka himna hi mitin mawhphurhna a ni tih thupui hmanga Champhai District chhunga High School zirlaite puala inelna buatsaihah hian Champhai Block Resource Centre (BRC) atangin zirlai 36, Khawbung Block Resource Centre atangin zirlai 35, an vaiin 71 an tel thei a. BRC pahnih huamchhunga titha zual pathum thlanchhuahte chu District Level-ah endikna neih niin heta tang hian final result hi siam a ni. R.Lalhmangaihtluangi, Class-X, Govt. Thanchhuma Memorial High School, Farkawn chu pakhatna niin lawmman pawisafai Rs.10,000/- a dawng a, Lalnunpari, Class-IX, Govt. Khawbung High School chuan pahnihna dinhmun hauhin lawmman pawisafai Rs.7,000/- a dawng a, pathumna dinhmun hauhtu C.Lalnuntluangi, Class-IX, Govt. G.M High School, Champhai chuan lawmman pawisafai Rs.4,000/- a dawng a ni. Heng bakah hian a titha zual thlanchhuah dang 3, H.Lalruatkimi, Class-IX, Govt. G.M High School Champhai, K.Lalfakzuala, Class-IX, Govt. G.M High School Champhai leh Lalrintluangi, Class-X, Govt. Thanchhuma Memorial High School, Farkawn-te hnenah consolation prize Rs.1,000/- theuh hlan a ni bawk. Lawmmante hi Champhai District Honorary Wildlife Warden Pu Lalhlupuia leh DIPRO Champhai Dr.Lallawmkima ten an hlan a ni.

Champhai District Level Fire Prevention Committee thutkhawm thurel bawhzuiin kangmei hluar leh ven ngaihzual hun chhung hian kangmei laka fimkhur tura inzirtirna, kangmei ven tangkaina leh kang thelh kawnga hriattur pawimawhte leh tul dangte zirtirna kalpui chhoh mek zel a ni a. Awareness Campaign lam hawi programme buatsaih zingah High School Level Essay Writing Competition, Air Rifle Shooting Competition, Awareness Rally, Banner/Poster Campaign, kangmei tichhuaklo tura intiamkamna sawrkar Office leh khaw hrang hranga neih, VC leh YMA Branch hrang hranga inzirtirna lehkha pek leh Public Awareness Campaign-te a theih ang anga buatsaih a nih bakah, tlangau leh media kaltlanga inzirtirnate neih a ni bawk a. Kangmei ven kawnga thawk tha khua/veng pathum bakah chawimawi phu khua/veng 3 dangte hnenah lawmman pek leh, kangmei ven kawnga inzirtirna chungchanga nitin chhuak chanchinbu thawhhlawkte tan lawmman siam tum a ni bawk.