No.4244/2021-2022
Aizawl Vau thla ni 11, 2022: Vawiin khan Mizoram Rural Bank (MRB) chuan corporate social responsibility (CSR) atangin mi harsate tanpui nana a tul anga hman atan Lawngtlai Bawrhsap Dr Andrew H. Vanlaldika kutah pawisa fai Rs 1,00,000/- (cheng nuai khat) an hlan.

Vawiina Bawrhsap kuta tanpuina hlannaah hian Lawngtlaia MRB branch pahnih - Lawngtlai Branch leh Chandmary Branch-a thawktute telin, Lawngtlai District chhunga branch thut hmun dang - Sangau leh Bualpui 'NG'-ah te pawh MRB hian Rs 50,000/- (cheng sing nga) hlan turin an ruahman a. MRB hotute chuan mi dang tana thil tha tih theihna leh District chhunga mi harsa zawkte tana luan chhuahna remchang an nei chu lawmawm an tih thu Lawngtlai Bawrhsap hi hrilhin, Bawrhsapin an bank a ngai pawimawh thin chu an lawm hle tih an sawi bawk.

Lawngtlai Bawrhsap Dr Andrew H. Vanlaldika chuan Lawngtlai District chhungah khawsak harsa zawk tam tak an awm tih sawiin, a bikin tun hnaiah Myanmar buaina avangin raltlan thahnem tak, sawrkar leh khawtlangin an chhawmdawl lai an awm avangin chhawmdawlna leh tanpuina lam pawh mi tlawmngaite'n an pe deuh reng tih a sawi a. An mamawhzia hria a, Mizoram Rural Bank te'n cheng nuai khat lai mai an pe chu lawmawm a tih thu sawiin, tanpui ngaite tanpui nana mi inphalte inpek thinna chu a hlu tak zet a ni, a ti.

Lawngtlaia MRB branch pahnih Lawngtlai Branch leh Chandmary Branch te chu mipuiin an dawr nasat leh sawrkar pawhin a theih ang anga a hman tangkai an nih thu leh mipuiin an bawh chhan chu thawktute inpekna vang liau liau nia a hriat thu Lawngtlai Bawrhsap chuan sawiin, MRB-a thawktu zawng zawngte chu duhsakna a hlan bawk a ni.