No.3036/2021-2022
Aizawl, the 18th November 2021 : Vawiin khan Rural Development Minister Pu Lalruatkima chuan Mizorama nauban awmte vawnthata an chanchin zirna hmun tur Mizoram Orchid Centre, Maubuang ah a hawng a. Minister hi Aizawl South-III MLA Prof. F. Lalnunmawia'n a tawiawm a ni.

Minister Pu Lalruatkima chuan Mizoram Orchid Centre chu hun lokal zelah hmun hlu leh pawimawh tak a nih a beisei thusawiin a par chu a man a to em avangin Mizoram economy tan thil tangkai, sum lakluh theihna leh mipuite tan eizawnna kawng hawng thei nia a hriat thu a sawi a. Mizorama nauban awmte humhalh kawngah Orchid Centre chu hmun tangkai tak a ni thei dawn tiin keini hian kan ngaihhlut thiam leh kan humhalh a pawimawh a, damdawi siam nana an hman te, hotel leh in chei nana hman te leh thil danga nauban an hman te hi engtin nge sumah kan chantir thei ang tih ngaituaha rilru kan siam a pawimawh dawnin ka hria, a ti a. Helai hmunhma atana khawtlang in phal taka ram an pe chu an entawntlak tiin lawmthu a hrilh a ni.

RURBAN Scheme bultanna 2016 a Aibawk RD Block hnuaia Aibawk Cluster leh East Lungdar thlan a nih hnua hna tha taka an thawh avangin Ministry chuan Cluster 2 dang a rawn pek belh thu sawiin Minister chuan hei hi a thawktute inpekna leh thawhrimna leh khawtlang hruaitute leh mipuite nena an thawhhona a that a avangin a ni a ti, hna an thawh that avanga Cluster 2 min pek belh kha a fakawm hle a ni a ti. RURBAN Scheme chuan a huamzau thusawiin a tum ber chu khawpui leh thingtlang khaute hmasawnna kawngah in thlauh lutuk loh nana kawng hrang hranga hmalak a ruahmanna siam a ni thu a sawi a. Hemi hmangin Aibawk Cluster hnuaia futsal te, bazar hmunhma leh hmasawnna ruhrel dangte sak niin Block mipuiten eizawnna kawng an nei belh thei nana kawng kawhhmuh leh a kaihhnawih zirtirna pek a nih thu te a sawi a. Mizoram RD Block 22 danga he Scheme hi hman anih theih nan Ministry lamah dilna thehluh mek a nih thu a sawi lang bawk a ni.

Aibawk RD Block hnuai khualzin hip theihna hmun hma engemaw zat awmte leh helai ramngaw tha leh boruak nuam te chu Eco Tourism atan te, Adventure Tourism leh Rural Tourism tan rohlu tha tak sum a chantir theihna a nih avangin hengte hi eizawn nan engtin nge kan hmang tangkai theih ang tih hi kan ngaituah a tulin ka hria a, chutiang ngaihtuahna pu turin khawtlang mipuite a bik takin thalai te ka chah duh che u a ni, a ti.

He hun khualzahawma hmanpuitu bialtu MLA Prof. F. Lalnunmawia chuan SPMRM Scheme chu a bial Aibawk in an chhawr hle tiin mipuiin kawng hrang hrangin an tangkaipui mek a ni, a ti a. Khawvel ah nauban hralhna market chu market tha tak mai a par te pawh man to tak taka zawrh thin a nih dante sawiin Orchid Centre chu Maubang khawtlang tan nakinah eizawnna kawng thar hawng thei ruahmanna a nih a beisei thu a sawi a, khualzin hipna kawngah pawh ala tangkai theih thu te a sawi bawk a ni.

Programme hi Pu R. Zarzosanga, Secretary Rural Development in kaihruaiin Pi Irene Zohlimpuii Chongthu hnen atangin Orchid Centre sak dan chungchang Technical Report ngaihthlak a ni a. Pi Ethel Rothangpuii Project Director, DRDA Aizawl in lawmthu sawiin l hun a khar a ni.

Mizoram Orchid Centre Maubuang hi Shyama Prasad Mukherjee Rurban Mission (SPMRM) hnuaia cheng nuai 390 senga sak niin satu hi Mizoram Technocrats Tuikhuahtlang te a ni a. Mizoram Orchid Centre ah hian Mizorama awm nauban chi hrang hrang lakkhawma, vawnthata, tissue culture hmanga tihpun leh an chanchin zir te a tum ber a ni a. Eizawn nana hman tangkai theih dan te pawh zir a ni dawn a ni.

He Centre chhungah ah hian heng zirna tur Laboratory changtlung tak awm telin tissue culture tih theihna khawl chi hrang hrang pawh bun a ni a, Staff Quarters, Green House hrang hrang leh Guest House te a awm a. A implementing agency hi Rural Development Department niin Zoawi Orchids in an enkawl zui dawn a ni.Orchid Centre a nauban lakkhawm hi BIOCONE in an buaipui a ni. Mizorama hian nauban chi 350 chuang chhinchhiah a ni tawh a, a then te chu mang thei mai(threatened leh rare species) dinhmun awm mek te niin hengte pawh hi Orchid Centre ah hian seng luha humhalh a tihpun tum a ni.

Mizoram Orchid Centre hi April 2018 ah sak tan niin May 2019 khan sak zawh a ni a mahse hripui leng avangin tum hnih lai a hawn hun lo ruahman pawh sawn a ni.

Aibawk Cluster hi SPMRM hnuaia Mizorama Cluster 4 zinga pakhat niin SPMRM hnuaia India ram pum Cluster 300 chuang ah a titha pawl niin Top 10 Cluster ah an awm reng thin a. Aibawk Cluster hnuaia hian Maubuang leh a bulhnai khaw 10 dang an awm a ni.