No.3035/2021-2022

Aizawl, the 18th November 2021: Pu C. Lalrosanga, MP, Lok Sabha chuan vawiin khan Raj Bhavan-ah Governor Hari Babu Kambhampati a kawm a. He inkawmnaah hian MP leh Governor te chuan Mizoram state tana thil pawimawh tak tak an sawi dun a ni.

Governor Hari Babu nena an inkawmnah hian Pu C. Lalrosanga, MP chuan tunah hian Mizoram project pawimawh tak tak Central Sawrkarah a la tangkhang mek tih a sawi a. A bikin DoNER Ministry-ah phei chuan Mizoram sawrkarin project a thehluh te nawrkal ngai tak tak a awm nual tih a sawi a. MP a nihna angin vawi tam tak a nawr tawh thu a sawi a. 10 % Gross Budgetary Support of different Ministries of GOI for the North Eastern States hnuaiah pawisa tam tham tak dah hran a nih avangin Mizoram sawrkar project te hi la pawm hun a awm dawn tih a sawi a. Amaherawhchu, project thenkhat hmahmawhthlak te a awm avangin a nawr kal kawngah Governor chu theihtawp chhuah turin a ngen a ni.

Governor hnenah hian Pu C.Lalrosanga chuan Assam Rifles ten insawn chhuahna tur hmunhma Zokhawsangah an neih fel dim diam tawh thu a sawi a. Insawn chhuah kawngah Assam Rifles an khawmuang chu tha lo a tih thu sawiin an insawn chhuah hma Mizo mipuiin an duh tih sawiin Aizawl khawpui chep lutuk sawi fel nan pawh a thlahlelawm tawh tak zet a ni a ti. He thilah hian Governor chu inrawlh tura ngenin Assam Rifles te hian chhuanlam tur an nei tawh lo a; an DG,Assam Rifles pawhin Fur tui a hul hunah insawnchhuah an tum tih a hnenah a lo sawi daih tawh a ni a ti.

Governor Hari Babu chuan Mizoramin MP zuan zang tak a nei chu lawmawm a tih thu a sawi a. MP pakhatin state hmasawnna atan thil tam tak a ti thei tih sawiin Mizoram MP te chu tun aia nasa zawka tan la zual sauh tur leh MP Fund te pawh a zavaia hmasawnna hnathawna atana hmang turin a ngen a ni.

Governor chuan Mizo tawng 8th Schedules to the Constitution a telh chu thil awm tak nia a hria thu a sawi a. A theih anga hmalak a tum thu sawiin Mizoram MP te pawh an theih anga tan la tur leh hemi kawnga awrawl chhuah ring turin a chah bawk a. Heng bakah hian Kaladan Multi-Modal Transit Transport Project tangkai tur zia te leh he project hnathawh peihfel thuai a nih theih dan tur te pawh an sawi dun a ni.