No.3034/2021-2022

Aizawl, 18th November, 2021 : Vawiin khan Mizoram Larsap Dr.Hari Babu Kambhampati chuan Mizoram Upa Pawl (MUP) hruaitute chu Raj Bhavan ah lengah sawmin inkawmhona hun tha tak an nei a ni.

MUP hruaitute chuan an pawl dinhmun leh an hmalakna chi hrang hrangte Larsap an hrilfiah a, Mizoram chhungah Myanmar atangin raltlan mi 10000 chuang Mizoramah an rawn tlanchhiat thu sawiin, anni chhawmdawl leh tanpui kawngah hma lak sak tura an ngen bakah sawrkar laipuiin ngaihsak deuh se an duh thu an thlen a ni.

MUP hruaitute chuan Indian Constitution Eight Schedule a Mizo Tawng telh tura theihtawp chhuah sak turin larsap hi an ngen bawk a, hei hian Mizo thalaite Central Service leh All India Service ah an luh theih nan bakah kawng hrang hrangah a tangkai dawn tih an sawi a ni.

Mizoram chu India hmarchhak kilkhawra awm a nih avangin sawrkar laipuiin a ngaihthah deuh nia an hriat thu pawh sawiin Larsap hnenah Mizoramin ngaihsak a hlawh lehzual theih nan hma lak sak turin an ngen bawk a ni.

Larap chuan Mizoram Upa Pawlin Mizoram leh hnam hmasawnna tur kawng hrang hranga hma an lak thinna chu chhuanawm a tih thu sawiin ram leh hnam hmasawnna tura sawrkar hmaklakna hrang hrangah te tha taka thawhhopui zelah a sawm a, an tawnhriat hlu tak takte chu thangtharte tana pawimawh leh tangkai a nih avangin sawrkar finchhuah kawngah theihtawp chhuah zel turin a sawm bawk a ni.

Larsap chuan MUP hruaitute thu thlen chu a theih ang anga bawhzui sak a tum thu sawiin Mizoram mai bakah India hmarchhak chu Prime Minister pawhin a ngai pawimawh tih sawiin, amah mai bakah Union Minister te chu hmarchhak state tlawh chhuak vek turin a hrilh tawh a, Union Minister te pawhin hei hi tihhlawhtlin an tum tih a sawi a, Vice-President pawhin Mizoram rawn tlawh a tum thu a sawi bawk a ni.

Mizoram Upa Pawl hi kum 1957 khan din niin Mizoram chhunga District 8 ah Branch 586 an nei a, member 60000 chuang an awm a ni. Manipur, Meghalaya leh Tripura ah MUP member engemawzat an awm bawk a ni.