No.3033/2021-2022

Aizawl the 18th, November 2021 : Vawiin khan Mizoram Finance and Accounts Service Association (MFASA) chuan 26th Annual General Conference, 2021 chu Aijal Club-ah an hmang a. Deputy Chief Minister Pu Tawnluia chuan khuallian niin he hun hi a hmanpui a ni.

Khuallian Pu Tawnluia chuan MF&AS Officer te hnathawh tlangpui chu Budget siam leh enkawl te, Sorkar Accounts vawn that te, Audit buaipui leh Fund monitor leh Vet te niin an hnathawh leh mawhphurhna sanzia hriaa mipui leh Sorkar tan eng thil thar nge ka ngaihtuah chhuah theih ang tih rilru pu turin a chah a. State dang leh ram changkang zawk ten hmasawnna hna engnge an thawh tih zir a, Mizoram tan lakluh theih ve dan a awm em tih te zawng a hma la mawlh mawlh turin a fuih a ni.

Pu Tawnluia chuan Sorkar sum inrelbawlnaah MF&AS officer te chu an awmna hmun apiangah thurawn pe thei tur khawpa inchhiar taima a, thahnemngaihna thar nena thawk turin a chah a. Mizoram Sorkar sum enkawl hna (Financial Management) chu an kuta a awm avangin rinawmna nena thawk tur leh Service hrang hrang te nen thawhhona tha a awm theih nan entawn tlaka awm turin a fuih bawk a ni.

MF&AS officer te hi kum 1976 atangin Mizoram Sawrkarin a la (recruit) a. Department leh Office hrang hrangah MF&AS Officer te inzarpharhin post hrang hrang 87 an chelh a ni.

MFASA Conference hi nilenga neih niin chawhma hun hi Pu Ramchuana, President, MFASA chuan a kaihruai a. Kum 2021-a an member thi mi pakhat sunna hun an hmang a. Secretary report ngaihthlak niin khuallian Deputy Chief Minister Pu Tawnluia’n MFASA magazine a tlangzarh bawk a ni.

Chawhnuah hian rorel inkhawm neih niin agenda an sawiho zingah Mizoram Sorkar-in revenue tam zawk a lak luh theih nan institutional financing model mumal tak siam ni se tih te, an service inzarpharh leh tihlen dan tur te, an service hmasawnna tur kawng hrang hrang an sawiho a ni.